Besampika abis kerekai, pulai rami baka selama

NGIDUPKA main asal maya begawai.

TAUN 2018 suba sebedau kerekai penyakit Covid-19, semua pengawa Gawai Dayak di dua-tiga buah rumah panjai di Kanowit endang chukup rami.

Kebuah pia, pengerami Gawai Dayak mega diserimbaika enggau gawai lelabi, iya nya melah pinang. Ukai di Kanowit aja, tang di Julau, di Kapit, di Jalai Oya, di Sarikei, di Bintangor sereta mega di Saratok enggau Betong, mensia mayuh endang semua gagit begulu datai ba maya pengerami, kelebih agi Gawai Dayak.

Tang diatu, semua penge- rami nya nyadi mimpi aja, laban begulu pan enda ulih tegal tagang penyaki udu berampit. Ukai di Kanowit, Julau, Kapit, Binta- ngor, Saratok, Betong enggau semua menua bukai ti udah ditanggul ulih kerekai penyakit tu. Kitai enda ulih enda nerima penyakit Kubit-19 tu udah nyadi sebagi ari pengidup kitai.

Nyadi sebedau kerekai penyakit tu mega, sepengu- dah Gawai Dayak, mensia mayuh mega lalu ngeletakka maya ngiling tikai kena nutup Gawai. Tu pan nyadi mimpi mega laban lalu apin temu ni maya penyakit Covid-19 tu ngetu ngerekai.

Dulu ari tu endang mayuh orang mantah atur ngiling tikai ti pejalaika kelalu laun.

Enti nunda iya, pengerami tu patut dipejalaika dalam bulan Enam tang taja pia, suah bendar kitai sama bisi ninga pengerami ngiling tikai tu agi bisi diatur dalam bulan Lapan enggau Sembilan. Tang nadai meh ngawa, laban reti iya kitai Dayak agi mengkang gagit deka begawai taja pan udah lepas dua tiga bulan Gawai Dayak udah nyadi.

NGABIS PENEMBU GAWAI

Nyadi reti ngiling tikai nya, orang ke begawai tem-bu begawai laban tikai ti di- anchau kena begawai nyau udah digiling, lalu nadai agi alai duduk. Ba adat bansa Iban, sebedau begawai enda tau enda nganchau tikai dulu. Nitih adat asal bansa Iban endang bisi terantang tawak kena ngerah semua bala diri serumah nya awakka sama sereta ngilih tikai. Lalu enti tikai udah dianchau, orang empu rumah enggau semua pintu bilik dalam rumah nya udah sedia deka nerima penatai pengabang. Dalam adat basa bansa Iban, pengabang mesti dianti ngena tikai ti be- resi, nadai uras awakka sida lantang duduk ba tikai nya. Lalu enti tikai udah digiling baru, reti iya gawai udah tembu lalu pengabang pan endang udah nadai agi dia.

Iya ke bendar, udah bekau hari ketiga tauka hari keempat Gawai Dayak, jarang tikai ti enda digiling ulih orang empu ruai. Kebuah pia, laban takutka tikai ti manah nya kena indik kaki ti kamah pulai gawa, kena indik ukui, kena indik utai bukai ke bisi bejalai nengah ruai.

Tang enti agi bisi penga- bang datai udah bekau berapa hari begawai, orang empu ruai nadai sanggu nganchau tikai baru laban endang sigi adat basa bansa kitai Iban lebuh bisi penga- bang tauka temuai datai.

Nyadi lebuh ke nganchau tikai ba pun Gawai Dayak, orang empu ruai endang naka ulih milih tikai ti mema- nah dianchau. Bisi nya ngan- chau tikai peradani, bisi tikai rutan, bisi tikai bebuah digaga ari bemban tauka rutan, bisi nganchau tikai dibeli baka linoleum, tikai anyam sida ari menua Indonesia enggau tikai lampit. Dulu menya jarang nadai nganchau tikai idas digaga ari rutan enggau semambu kena ka lapik tikai bukai laban agi mayuh ke begelegarka buluh enggau papan tebelian maya nya suba. Tang diatu tebal agi rumah nadai begelegar agi tang begeladakka semin. Nya alai nadai tentu beguna ka tikai idas agi.

MULAIKA PENGINGAT

Bisi ga melair mimit ai mata meda tikai bemban bebuah anyam sida niang indai menya lalu lebuh ke nyenguk ngagai ruai bala petunggal penulis sepiak bisi mega meda tikai bemban anyam sida niang ibu, niang ini bilik sepiak menya. Tu semua mulaika pengingat begulai enggau sida niang indai, niang ibu, bala sida niang ini maya sida ke agi bisi ba dunya injau tu menya.

Peningat penulis, dalam taun 2015, rumah panjai di Bejait, Kanowit chukup rami ngintu pengawa ngiling tikai.

Kebuah pia, laban bisi dua tiga puluh iku bala pengabang ari rumah bukai ke ngulu pengerami bala serumah. Atur program nya nyengkaum batak tali, main bintin ungkup indu enggau lelaki, pekit nyumpit ka bala anak mit enggau besai tuai sereta mega enggau pekit belaban pemesai betis ungkup bala indai orang. Tu siti pekit ti balat ngasuh orang geli ati ketawa laban bisi bala sekeda baru meda pemesai betis bala bini pangan diri.

“Pedis perut ketawa meda ulah sida ke bepekit pemesai betis,” ku tuai aya seiku ke madahka bini iya enda enggau laban nemu betis diri numbas pemesai.

Seiku ipar penulis nya ke enda ngasuh dama iya ditulis ditu endang amat pama pemesai betis. Sangka aku ti ninggang anak mit umur lima taun tau luput laban pemerat betis iya. Ukai mina betis ke ganggam, tubuh bukai pan ganggam meh. Alah betis bala kami ke lelaki laban sekeda sida nya. Aruh ga gagit bendar deka enggau orang masuk pekit.

Kena malam 30 Mei taun nya bala di Bejait bisi ngatur siti pekit ti ngasuh balat geli bendar ati iya nya pekit ngena ngepan nyelaie ti endang dikena ngasuh orang ketawa.

Dalam jaku Inglis atur pekit nya dikumbai fancy dress contest. Nyadi tu ungkup bala indai enggau ini orang aja. Bala sida ke ini orang nyau bakachirak pemirah insu mulut sida sereta digerinek enggau chuk bulu bansu. Asai ke meda sida Sophia Loren, Elizabeth Taylor enggau Bridgette Bardot maya sida nya benung top kelia. Sigi bajik indu Iban enti udah nganta. Bisi bala laki sida nyau abis enda ngelala bini diri; pia mega bala uchu sida bisi enda ngelala ini diri empu agi laban udah jauh bebali tegal ngena makeup. Akai rai amat bisi ngasuh ketawa ga laban uchu siku ari sida ini orang nya nyau rauh-rauh nyabak laban enda nemu tunga ini diri. Ini iya nya endang bisi dia tang udah transformed laban udah dipasang makeup enggau buok wig ulih nginjau ari sida ke dara.

Munyi ku lagu kaban aku siku penanyi Iban agi biak Leez Zwita, amat tau dikumbai ‘bajik tuai’. Ku iya: “Jaga bala kita aya, diatu bala sida ibu udah ka nganta.”

GAGA NERIMA PERAIS

Nyadi perais ungkup si- da ke bepekit nya endang manah magang laban bisi orang spunsa. Ka tambah mata duit enggau hamper (bakul penuh laban pemakai) sida ke menang nya bisi ga bulih perais bukai baka kain tula, ubat berus ngeli (Colgate), sabun mandi enggau sabun basu, rengka dapur baka chapak mangkuk, sudu sereta enggau utai bukai.

Bala sida ke masuk pekit karaoke nya mega bulih perais mata duit enggau tropi. Semua tu endang ari spunsa bala mensia mayuh kami serumah nya, kelebih agi bala sekeda ke gawa di nengeri di menua Malaysia ditu enggau di menua tasik. Bala sida tu ke sama bisi pulai begawai di rumah panjai sigi nadai sanggu mansutka belanja mimit kena berami.

Tebal agi di menua Kano- wit, ngiling tikai tu tembu enggau atur ngilingka tikai ambika kelaie pengerami begawai tembu lalu ditutup. Endang udah nyadi utai teleba nyadi ba menua Batang Rajang, bala kami seruran nembuka atur begawai ngena ranyai. Udah ranyai nya diketas tauka tembu dijelai nya baru abis pengawa ngiling bidai, ku sida.

NUTUP PENGERAMI

Reti nyelai ranyai ke bendar nya ngayuka orang ke nyayau bulih pala kelia ngetas pala ke digantung sida ba atas bedilang laban ke disalai udah bekau dibai ari mena-lan perang. Kelia orang nirika ranyai ke alai sida ngantung sekeda pala munsuh dengah sida maya ke bepantap maya ngayau. Nya alai enda tentu tau dikereja sebarang pengawa beranyai tu. Mina orang ke tuai bulu tau nyadi pun pe- ngawa beranyai enggaika alah ayu, ku orang tuai menya. Beduduk ari tu, aku empu enti bisi kena asuh orang nyelai ranyai, enda tau enda bedara dulu – iya nya ngiri ai tuak/arak bisa kena minta ampun sereta sah ari orang tuai ke udah nadai, kelebih bala diri sebilik ke bisi tampun (udah bedengah) sereta sida ke tuai bulu.

Kelimpah ari kena nutup rami Gawai Dayak, atur ngi-ling tikai tu mega awak ti ma- nah kena bala diri serumah, diri sebilik enggau diri sekaban sama berami negika pe- ngering tali kaul enggau pa- ngan diri, sama segulai sejalai ngemansangka diri.

Nyadi penulis ngarapka semua pengawa begulu, ke- lebih agi baka Gawai Dayak enggau pengerami bukai ulih terus diatur baka sebedau taun 2019 suba, iya nya maya menua likun ari kerekai penya- kit Covid-19 ke diatu udah bisi ‘variant’ dikumbai Delta variant ti chukup bisa sereta chukup jampat ngerekai.

Kitai sama bela besampika pengidup kitai pulai selamat baka selama, jauh ari penya- kit enggau penekul, Amen.

Oleh TELESA EMPERAN