Anang empelita enggau sampi, biau

GAGA nyambut pemeri maya melah pinang.

MAYA umur baru manggai 10 taun kelia, tudah pangan endang udah diajar sida niang indai menya pasal sekeda leka sampi, belabuh enggau sampi kena ngepun pengawa bumai berengkah ari sampi matah munyi entudi tu.

Ni kita Petara, kitai Ini Inda. Aku ngambi kita enggau asi enggau tumpi,

Aku ngambi kita enggau arak, enggau tuak. Kita nulung mandung aku magang. Ngambika padu kau berisi, beigi-igi, ngambika padi aku beserak, bepitak. Beranak seratus, beranak sepuluh. Enda jelungan, enda kelabawan. Ngasuh iya bepangkat, ngasuh bepinat, nyadi penuh langkau, penuh dangau.

Enda midang, enda lelang, enda pambar, enda liar. Kita chelap lindap, aku pan chelap embap. Ngasuh sakungkun, sarimpun, mai batu asi, batu tumpi, batu bidik, batu lansik. Ngambi aku endang singgang, ngambi aku enda lapang, ngambi aku ngebung baka langit, ngambi aku empusung baka bukit.

Nyadi pengawa tu dikereja orang indu, tang laban kami nadai anak indu enggau begulai tegal menyadi tuai aku udah belaki nguai, nya alai tudah pangan meh diajar orang ngereja pengawa indu, nyengkaum nyampi. Udah nya bisi ga geli ati ketawa laban lebuh diasuh indai seduai ini munuh manuk, aku lalu terus ngetak rekung manuk enda chechamang. Nya meh terubah nyemelih manuk kelia.

Nyadi sekali lebuh enggau indai seduai ini malu tubai ba ulu sungai mit, aku bisi mega diajar seduai pasal sampi miau tubai baka di baruh tu.

Oh-ha! Oh-ha! Oh-ha! Tu ukai tubai ngapa, tubai sungga. Ukai tubai burung, ukai bai terung. Tang enda endang leka diberi sida Laja, diberi sida Bungai Jawa, diberi sida Keling, diberi sida Bungai Nuing.  Ngasi nyedi, munuh meh nuan, pagila lusa, tulat lupat, lalu nuan ngirau rantau, nyaruk lubuk.  Nyadi nuan digelar kami rusa, nunyau rantau, nyaruk lubuk. Patah tetuai, lalu patah tebiak, patah apai. Patah indai. Bisa peregi Dom tu, Beji duman nuan. Antu  Rebak Antu Rusa. Anang nyelingau, anang mamau, tang ngeransau batang. Ngeransau agang.

Penemu tu kena nambahka penemu bukai mega laban semua sampi tu endang bisi sangkut paut enggau pangan diri. Semadi nyau maya umur udah tuai agi baru bisi belajar mimit pasal biau, kelebih agi biau pengabang. Nyadi entudi tu kitai bekunsika mimit pasal biau pengabang ti teleba dikena tukang biau maya diasuh miau pengabang, munyi entudi tu.

              BIAU PENGABANG

Oh-ha! Oh-ha! Oh ha!

Nama ke semetak inggar temekung?

Munyi ka masak chagak bedil kelutung. Tebah Kemendan Tuan Linsung, Didinga ari pun

Semambu ngandung kunjung-kunjung nyadi benung tajau bujang. Kebungka burung tiung lelaki. Nama ke semetak inggar didinga? Munyi ka masak chagak bedil temaga. Tebah bini tuan Raja, didinga ari Singapura, pansa geruda kapal bekejang. Ngadapka leka matahari mati. Nama ke semetak inggar memunyi? Munyi ke masak chagak bedil besi. Tebah bini Tuan Bili, didinga ari titi langit lati, lanji-lanji tengkak sawing.

Ari nya baru aku ngangauka Ribai datai ari tasik besai Linang Ledung, betumpu alan, berimbai enggau Menyalin Bungai, tutup Temaga Lawai Bunsu Garai, Berumah di Rantai Panjai Tinggang Telesai Bungai Engkuang.

Ngangauka Chendung Lampung Pellingan, Puchung begantung nengan bulan, Bunsu Bundan, orang tau nangga gawa gigi gumbang, Rumbai beranakka Lulong datai ari Segupong Ari Tanah Sembah Di Kelasah Pandan Bekuang. Beranakka Kumang Nepan di takung apung beluyah menyadi Saripah Aka Tuan. Jadi enggau Sigi Beru Hari Ninggang Kunchi Guntur Betinggang, Jadi enggau Sigai Beru Lemai Ninggang Telesai Ujang Saying. Nya orang ngemeranka batu pesuk Teman tunjuk jari lima. Ai belambuk ngampuhka menua, nya menua Apai Miga Betanduk Ngena. Umba ketapu buk galung bauh ngelegetang.

Rumbur ka Sibau rambuk bulu, menua ampa raya tekebu, sebuah tukau bangkung langkau menua Lemandau datai ari ngelepau Gumbang besabung. Menua pating Aur Pengerindu lendu-lendu maguhka ulu Belimbun Jawa. Takang, buluh ayu ngachuhka ulu Putih Menyala. Nya menua Raja Bangka Bedinding Hari Sukadana Bebulu Ati.

Nya betampung enggau menua Raja Segangga Gunggung Penyadung Antu Tuah Berimbai enggau Raja Segangga Ganggai Penatai Antu Limpah, nya jadi enggau Kemeli Kemantan Padi diambi kenyap tinduk lina. Dia sida mai pengaruh, Batu Lementak Bai Ngabang, ngambika tau nyelepak awak menua orang. Batu Duri Bai Ngabang Ulih Nemu Dilampung Tekalung Pundang. Taring Uting Babi Ngelampai Tanduk Rusa Mulai, Gemala Panggum Tupai Diberi Orang Tuai Mansang Nandai Selit Di Punggai Putting Ilang. Awakka gayu, awakka guru, awakka gerai, awakka nyamai! Raja nguan menua!

SAMBUNG BIAU

Kami minta jalai bidik enggau lansik, mimta betuah enggau belimpah, minta gerai enggau nyamai, mina chelap minta embab. Aku ngangauka Petara Aki, Petara Ini, ngangauka orang ke lama udah lelang, lama udah midang. Sida ke udah parai, ke udah nadai, nya dikangau, dipesau, nya aku kumbai, aku lambai.

Nyaup aku ngupas padung, ngupas tilung, ngupas panggang, ngupas ruang, ngupas penuduk, ngupas pendinduk, ngupas ruai, ngupas tikai. Ngambika iya bau rengut, bau garu, baru empenit, bau bangkit. Ngambika endur betunggah, endur besembah. Ngambi tampak Tuan, tampak Sultan, tampak China, tampak Belanda, tampak Laut, tampak Bunut. Tu endur besauh, endur belabuh, endur betanya, endur bepinta. Ngambi kami mansang, kami nyegang, kami ngebung baka langit, empusung baka bukit. Ruai kami baka danau, tampak meh kami tu baka pulau. Gayu guru! Gerai nyamai! Semua kitai! Ooohhaaaa!

Nyadi ba segenap bengkah pengawa kitai endang semampai ninga orang miau. Tuju biau tu sama, iya nya kena minta berekat ari Petara, awakka mantu kitai, ngagih pengerai, awakka kitai semampai dalam penyenang, dalam pengelantang.

Biau tu ngena manuk. Selalu agi ga orang miau ngena manuk lelaki tauka manuk udah lanjau enggau manuk sabung. Kekadang bulu manuk kena miau nya pan nunda pinta orang ti dibiau. Ambika banding sebuah rumah panjai di Melupa dalam Saratok, sida meseti dibiau ngena manuk biring, laban nya meh bulu sida kenyau ari kelia, kenyau ari Anya ‘Lebur Menua’, kenyau ari Naing Pengerambing Kuta, Berinau Panggau Dara; kenyau ari Lanang Kasih Sayang Bedindang Madang Rutan, Tawie Berani Ati Pengemudi Iban; kenyau ari Subung ke bensumbar Kala Nyepit Naka Pemisa-misa, Bunga Parapenit ka Dujung Indu Dara; kenyau ari Mulok ke bensumbar Bandau Nulang Nanga Mepi; kenyau Jerampang Saat ke begela Pantu Batu Nanga Igan, Indu Balu Ditemu Tengah Malam; kenyau ari Tindin Apai Gawing ke bensumbar Pipit Manchal Menua Ili, Gelumbang Mechah Hari Jai; kenyau ari Nyawin Medan ke begela Lambur Mandang Punggang Menua, Api Nyadi Pasar Buso; kenyau ari Ujih Untan ke begela Kelambu Kumang Begitang Nengan Hari, Baya Mangah Betegah Panggau Kemudi.

Beduduk ari chukup mayuh orang berani, orang bedengah, nya alai bala orang serumah nya enda tau enda dibiau ngena manuk biring. Kala utai nyadi taun 1976 kelia maya sida serumah nya bejadika seiku anak lelaki sida enggau indu orang Penunus dalam Rimbas ti alai orang Penunus nadai betanya, ngujungka orang bala orang serumah nya enda dibiau ngena manuk biring. Sida dibiau ngena manuk bulu bukai. Nyadi lebuh deka muka kujuk dalam bilik indu, dinding ruai sida sebilik ari papan teras tebabak sereta lalu ngujungka orang dalam bilik dipeda ari ruai laban dinding tebabak magang. Udah sida nya pulai ngagai rumah sida empu dalam Melupa, seiku sida bisi ngambi mimpi laban seiku orang bedengah ari rumah nya, Ngauh Narang besumbar ‘Layang Mandi Pukul Lapan’ dipeda iya mabak dinding laban ngeransi tegal enda dibiau ngena manuk biring. Ngauh parai tiga taun dulu ari pengawa bejadi nya.

Nya alai enda tau dimain-main ga pasal pengawa bebiau tu.

Oleh TELESA EMPERAN