NOVEL TERUTU JEMU AMBUN LEMAI

TUSUN KE-13

SITI agi cherita ngasuh sinu. Siku Sapit Kepala Pengajar di sekula primari di Bandaraya Kuching dianjung ngagai sebuah sekula di pelilih menua Betong nyadi Kepala Pengajar. Iya bisi kes penyakit jantung tang deka iya enda nerima tawaran niki pangkat nya nyangka icha iya ulih betukar sekula.

Kenu ku cherita, iya kala ngapil minta diengkah ba sekula ke semak agi ari Nengeri Kuching tang apil iya enda dikemendarka opis ke bekuasa ketegal nya kes niki pangkat. Pengajar nya berunding deka ngapil baru, nya alai iya enda mai bini anak iya enggau. Tambah mega anak iya ke besekula enggai nyadi dipindah ke menua ulu.

Pagi hari siti, pengajar nya ditemu orang laun nurun gawa. Jenila rumah iya nadai dibuka. Bala pengajar enda nyamai ati, nya alai sida lalu ngabas. Peda bala pengajar iya tak agi garing- garing gali baka ke tinduk ba peninduk iya. Orang enda nemu ni maya iya dituntung penusah nya. Kasih tudah pengajar nya tak mati tinduk ba kuarters iya.

KENA JAMAH KETEGAL DISPLIN

Siti agi cherita ti mandangka pengajar amat-amat berambunka nyawa. Urung ujung taun 70-an suba siku Kepala Pengajar sebuah sekula sekondari di menua pesisir baru betukar ngambi tempat Kepala Pengajar ke dulu. Iya meda disiplin sekula bangat tak kelalu jai. Mayuh bendar bala nembiak lelaki bekekepik ngena selipar datai ngagai kelas. Baju bekebichai nadai disimpan ke dalam tanchut. Sida nya bebuk panjai. Sida nadai pedulika rara pengajar. Kepala Pengajar baru baum enggau bala warden lalu enggau pemerani nya meri jaku tangkan ngagai raban nembiak nya meri sida timpuh sebulan alai sida ngubah perangai sida.

Timpuh sebulan nya dipikirka chukup alai sida nembiak ke baka nya bebelika kasut uniform sekula. Sebulan nya chukup alai sida ngubah ulah diri nyimpan baju ke dalam tanchut.

Udah bekau sebulan, bala warden enggau Kepala Pengajar lalu bejalaika atur dikena nentuka semua nem- biak ngasi lalu bebasaka undang-undang sekula. Nembiak sekula patut bepekayan sereta beperangai baka nembiak sekula. Bisi tiga iku nembiak ditemu enda bedulika jaku tangkan nya. Sida tiga iya diberi jaku tangkan kepenudi. Udah seminggu, nadai ga sida berubah. Kepala Pengajar enggau bala waden besetuju deka ngelabuhka ukum ba sida tiga iku nembiak lelaki nya udah bekau berunding dalam aum.

Lebuh maya begempuru, sida tiga nya dikangau ngagai atas panggau. Sida disipat enggau rutan tiga kali ba burit. Bala warden pan lalu nguntin buk sida ke panjai. Dua iku ari sida nya nadai ngelaban.

Seduai iya nurut aja. Sipat nya ukai tak penapat inat laban maya nya Kepala Pengajar bisi kuasa tau nyipat nembiak. Siku nembiak nya nyelai lalu chukup berani. Nyau pengujung, iya nerima ukum nya tang lalu meri tang-kan ngagai Kepala Pengajar ngasuh Kepala Pengajar ngadang.

Nembiak ke berani nya lalu pulai ke rumah. Bala warden enggau Kepala Pengajar sereta enggau bala prefect lalu bejaga-jaga. Nitihka che- rita bala nembiak, apai nembiak nya orang ke lengkar lalu suah ditemu orang betumbuk lebuh maya nyabung. Kepala Pengajar nya nadai takut. Kati ku enggau. Iya bejalaika adat nya ukai iya sengaja deka ngemediska nembiak nya. Tuju ngukum nembiak ukai deka ngemaluka iya tang dikena ngajar iya. Enti iya enda ngasika pengajar manah mih iya dijaga apai indai iya. Kepala Pengajar ke bejalaika adat sekula nya ukai ke penguntung iya tang ke penguntung sekula enggau nembiak empu.

Urung ngalih hari Hari Satu, Kepala Pengajar endang baka selama. Iya ngambi anak iya pulai sekula ari sekula primari enda jauh ari nya. Iya enda tama ngagai kandang sekula tang ngetu ba tisi jalai ba simpang ngagai sekula nganti anak iya datai. Kepala Pengajar nya pansut ari kerita iya enda lama ngemataka dua iku anak iya; siku lelaki, siku indu pansut ari kelas seduai. Iya lalu nguing deka tama ngagai kerita lalu nganti dia.

Jam nya mih tiga iku lelaki tengan umur datai lalu ngerapat Kepala Pengajar. Siku lelaki nya baruh sereta paga. Dua iku nya tinggi sereta kurus. Dua iku ke kurus nya lalu enda chamang-chamang, nangkap Kepala Pengajar nya, siku ari sepiak. Siku ari seduai nya lalu ngeleka tang siku agi lalu masang bunga kangkam ba pegu. Kedua-dua jari Kepala Pengajar nya dipelawikka penyerang nya ke belakang, lalu jari dua piak penyerang pan lalu ditanggam iya ba pegu Kepala Pengajar. Patung penyerang nya ditanggung iya awakka Kepala Pengajar nya kating-kating laban Kepala Pengajar nya baruh ari iya lalu gamal iya pan enda tentu tegap.

Ku ati sida tiga nadai pemedis ngerenyuk Kepala Pengajar nya. Jam Kepala Pengajar nya kual-kual baka nya, iya ke paga nya lalu mansang jampat megai seguntin ba jari iya.Ku ati iya deka nguntin buk Kepala Pengajar. Kepala Pengajar ngelembutka diri sekejap awakka perekuh penyerang iya enda bengat rapit. Sereta iya ke paga nya semak kira Kepala Pengajar udah ulih diterajang iya, Kepala Pengajar lalu nerajang ‘paga’ ba perut iya.

Paga’ lalu seledadang. Laban ke betunjan ba ‘paga’, Kepala Pengajar teulihka kuda lalu ngesaika diri ari perekuh bunga kangkam.

Siku ke kurus tadi lalu mansutka rantai lalu miau-miauka nya nuju Kepala Pengajar. Kepala Pengajar ulih nyilat lalu rantai nya rapas. Kepala Pengajar lalu belanda ngagai motokar iya. Ba baruh penu- duk dia bisi sebilah duku pesindang iya. Enti penyerang nya tak majak deka nyamah iya, nadai ku enda ngena duku nya mih nyaga diri. Lebuh meda sida enda nitih, Kepala Pengajar enda berun- dingka senyata nya agi.

Kepala Pengajar udah nya ngambi anak iya lalu mulaika diri beguai-guai ngagai sekula. Udah nya Kepala Pengajar nya lalu madah ngagai bala warden pasal utai ti udah nyadi. Iya pan nepan kerita ngelawa Balai Polis enda jauh ari nya lalu ngeripot utai ke udah nyadi. Ke penerang iya udah diamuk orang nya, ba pegu iya bisi rajai mimit tang enda bedarah. Bisi bekau buk bisi kena guntin. ‘Paga’ bisi teulih mimit buk ba pegu Kepala Pengajar.

Bala polis pan lalu beguai- guai nyidi tang bisi orang ke meda, sida tiga iya udah nepan teksi. Ari penerang ke ulih bala polis ari orang ke bisi meda, polis lalu nemu penatai orang nya.

Hari siti bala polis ulih nangkap sida iya. Iya ke paga nya apai nembiak ke berani ngelaban pengajar. Seduai dua iku ke kurus nya aya nembiak nya lalu diau di rumah panjai ke sama. Kes nya nyadi kes polis, nya alai sida nya lalu dipechara. Tuan D.O. ke mega magistret ba menua nya, ngelabuhka ukum jil sebulan ngaga sida tiga laban sida iya nyerang enggau niat deka ngemedis Kepala Pengajar nya.

Cherita pasal Kepala Pengajar ke belaban enggau tiga iku penyerang iya nyadi ke buah kenang orang ba pasar mit menua nya. Siku orang ke gawa ba Loji Pengepam Ai ba pasar nya ke kala begulai gawa enggau Kepala Pengajar nya, madah ngagai orang pasal Kepala Pengajar nya endang nemu kuntau. Mayuh orang pechaya. Enti iya enda nemu jari tentu iya ulih direnyuk orang tiga iku nya.

PENGAJAR UDAH PINCHIN

Nambahka cherita Kepala Pengajar ke dijamah orang nya, Nadia berasai sinu ingatka cherita siku pengajar ke udah pinchin.“Kami pengajar tu tau disemaka baka empeliau ke bebagi iku. Iya magi iku panjai iya ngagai jelu bukai datai ke iya nyau enda teingatka diri. Nyau pengujung, iya empu nadai agi iku. Nya alai kami ke pengajar ke mayuh agi, lebuh belabuh gawa dikumbai cikgu lalu udah badu gawa pan dikumbai cikgu. Mayuh bendar nembiak ke udah diajar nyau nyadi pemesai lalu diau senang lantang. Tudah kami agi baka manuk, idup kair pantuk, idup ngena anak pinchin ti mansang turun rega ketegal rega barang ke berapa kali udah niki. Pinchin nya bisi ditambah enti skel tangga gaji bisi ditikika baru tang nya nadai besai. Perintah kala mega udah meri sagu ati, meri bonus mimit,” ku siku pengajar ke udah pinchin nusi jerita senentang pengi- dup diri empu.

Nya cherita ari siku pengajar tang ke bendar, Nadia ingatka mayuh pengajar ke udah pinchin enda ngenatka pinchin nya aja. Sida bekenanas ngiga penatai belanja lebih awakka pengidup nyamai agi. Bisi sida bulih lisin bedagang. Sekeda bisi ampit enggau nyadi kontrekta ngambi tender enggau orang nangkap kontrek. Sekeda bejalaika Insurans lalu sekeda bisi nampung setaun dua ba Opis Pelajar nyadi pengajar kontrek. Sida ke bukai bisi pulai ke menua ngagai rumah panjai. Sida bekebun lada, nanam kelapa sawit tauka begagaka projek nupi ikan. Bisi ke ngembuan pengelandik jari bisi peluang numbuhka syarikat ngeluarka kain batik. Sida ke tampak agi semengat lalu ditemu perintah dipaduka nyadi tuai rumah, kunsilor tauka penghulu. Bisi mega terus nyadi pemancha. Sida ke diau di nengeri bisi mega ke numbuhka kelas tuition.

Enda mega tinggal, mayuh bala pengajar belajar baru nyadi guru graduate. Sekeda ngambi Masters lalu bisi ke rajin agi terus ngambi Ph.D. udah nya bulih penuduk ke tinggi agi di Opis Pelajar tauka nyadi pengelicha di universiti. Kelimpah ari nya, bisi mega ke ngetu nyadi cikgu, enggau orang bepolitik lalu enggau masuk nyadi chalun. Nya alai mayuh sida mujur lalu ukai semina nyadi wakil rayat, Yang Berhormat, tang mega lalu nyadi menteri. Ba kes tu, sida iya enda dikumbai cikgu agi tang nyau dikangau YB.
PENGAJAR KE CHUAN TELADAN

Iya ke disebut Nadia nya pengajar ba endur bukai lalu sekeda nya udah badu gawa tauka pinchin. Lebuh Nadia beratika pengajar sida ke diatu, iya nemu mayuh mega ulah enggau perangai sida. Ba Nadia, Cikgu Dayang endang orang ke tau ke teladan; nyadi role model. Ba pengawa ngajar, Cikgu Dayang endang dipuji nembiak. Iya ditemu nadai pelinte tang bebendar ngereja pengawa. Iya nadai ditemu bepilih kasih. Nadai ngena adat bisi niki nibung, bisi niki pinang. Taja iya nadai jauh tuai ari bala nembiak, iya ulih ngatur ulah diri lalu enda nejuka diri dikeduan nembiak. Iya nemu maya bebendar lalu nemu maya betundi enggau nembiak. Ari nya iya nyadi pengajar ke dikenangi sereta dibasa nembiak. Nambahka nya iya ngembuan penyinu enggau penyiru. Enti iya ukai orang ke siru enggau penyinu, tentu iya nadai irauka Nadia suba lebuh Nadia kena tinggang penusah ti ngujungka iya enda ulih pulai ke sekula.

Entara penanggul bukai, sekeda pengajar ngambi peluang bejual utai diempa ngagai nembiak, bepekit enggau kantin sekula. Bisi mega pengajar ke enda sepenemu enggau Kepala Pengajar ngambi ulih ba nembiak, ngasut sida lalu ngerachun runding sida awakka ngelaban atur sekula. Enda tau nadai mega pengajar biak enda nemu endur diri tak bepangan enggau nembiak sekula.

MAYUH BENGKAH ULAH PENGAJAR

Kelimpah ari nya, bisi siku dua pengajar nya orang ke garang lalu galak datai jari ba nembiak lebuh ke lenyau sabar ketegal ulah nembiak. Bisi mega bansa pengajar nya semina makai gaji aja, nadai deka ngereja pengawa lebih. Tak semina anang enda ngereja pengawa nganti ke terima lebuh ujung bulan. Sida tu nadai juluk ati tinggi deka ngemansangka nembiak tauka nyuluk nama enggau rita ke diri empu. Sida ngenatka pengelandik lama lalu nadai nguji deka ngubah jalai chara sida ngajar. Sida nadai ati deka ngiga teknik enggau akal ke baru dikena ngajar awakka utai ti diajar sida ngerindu sereta ngeran- singka nembiak. Nitihka utai ti dibacha Nadia, orang ke baka tu dikumbai orang dead wood; papung kayu ke nadai guna agi.

Taja pia, mayuh ga pengajar nya orang ke berambunka nyawa ngereja pengawa. Sida besedia gawa ke raban bansa diri, ngemansangka nembiak, sekula enggau menua. Penanggul iya, sida ke manah pengawa nya nadai ditemu orang. Nyau sida ke cherida sereta melisa diau nya, ke nampak rita, jelai nama lalu nyunting arang ba mua orang ke manah pengawa enggau perangai.

Lebuh Nadia ngerunding pekara nya, iya lalu ngaga siti simpul penemu. Endang amat munyi ku pantun orang, mayuh bunga mayuh kesulai, mayuh mensia mayuh perangai. Buah kepayang ngadaka dilah, mayuh orang mayuh ga jelekah. Sekerat kasam ke bulat, seudat-udat ke dikumbai jai lalu dibuai. Nya endang adat dunya.

Taja jelekah bala pengajar mayuh, Kepala Pengajar ke landik megai orang, nadai penanggul ga mutarka penanggul nya ti ngasuh sebuah sekula nyadi endur ke selamat alai nembiak diau enggau belajar tauka alai pengajar gawa. Sekula nya palan alai nyepuh ngambuh, nempa nyelada nembiak ke deka nyadi tulang belakang menua ke dudi hari ila.

Oleh JANTAN UMBAT