Tetap dikerindu taja pan timpang mimit

Uji tempa tauka gaga manah agi, leka lagu kita, pia ku penemu seiku penanyi veteran ti enda ngasuh nama iya ditulis ditu. Indu ti mansutka penemu nya endang dulu suba chukup tebilang, lalu sudah dibai nandang ke ulu ke ili maya iya agi regas, kelimpah ari ti mula rekoding ba Radio Iban berengkah ari pun taun 1960an kelia.

Diatu tudah tuai enda entu kungang tang agi ga bisi dipinta merindang nba pengerami baka melah pinang ba rumah tauka hotel di Kuching ditu.

   RANDAU ENGGAU PENINGA

Kelimpah ari penanyi veteran tu, penulis mega bisi berandau enggau mayuh bala peninga ke madah mengkang enda puas ati ninga leka tauka lirik dalam sekeda lagu artis rekoding ti agi mayuh endar sebarang embal, tauka seneka ati ngaga. Leka lagu bakanya patut digaga manah agi awakka nyamai, ngena sereta nyemetak didinga.

Asal iya setimbal, munyi ti ngena aja, laban mayuh peninga nadai entu bedulika reti enggau pengena leka lagu nya. Mayuh ga lagu ngena jaku tauka leka diambi ari jaku Melayu tajapan endang bisi jaku nya empu dalam jaku Iban. Ambika banding leka tauka lirik baka ‘syurga’ patut iya ‘serega’, ‘dunia’ patut iya ‘dunya’, jaku ‘cinta’ nadai dalam jaku Iban tang tau ngena ‘penyayau’ tauka ‘pengerindu’. Nadai mega jaku kitai Iban baka ‘paling’ tang bisi dikena sekeda penanyi dalam leka lagu sida. Mayuh agi leka bukai dikena awakka setimbal lalu kena ngenyukupka sada lagu siti-siti.

Laban nadai orang tauka kuasa nyemetak ditaga kena meresa, napis lalu nentu pengena enggau pemetul leka lagu, nya alai lebuh lagu nya dirikot sereta dipasang ba radio tauka dimain peninga, dia deh sekeda leka lagu nya berupai enda ngena, enda betul dikena sereta enda manah reti tauka ngemai reti ti negatif.

Dulu ari tu penulis bisi berandau enggau penanyi ke begelar Mama Rock, iya nya Rosiana Urai, ke mega tukay studio rekoding Urai Productions di Sibu.

     RETI NUMBAS PEMETUL

Urai madah, bisi sekeda lagu Iban baru diatu ngemai reti ti numbas iya pengena, iya nya tau dikumbai kitai ‘negatif’ taja pan jaku dikena nya nadai salah.

“Ambika banding, bisi leka lagu ti madah indu nya enggai pulai puang, enggai pulai nadai utai ulih. Reti nya bisi negatif, laban reti nya nya enda tau enda bulih utai…lalu nama utai nya, kitai empu nemu nyagam reti nya,” ku Urai bejaku enggau penulis sereta madah diri, taja pan ukai bansa Iban, tang mereti bendar pasal jaku Iban.

“Leka lagu kitai enda patut nyilup reti ti enda manah, laban taja pan leka jaku nya setimbal, tang ukai reti semua jaku nya ngena magang, lalu kami penanyi kala mega dikempelin tauka dibantah ulih bala peninga laban ngena leka lagu ti ngemai reti ti enda manah, iya nya reti ti negatif,” ku Urai ke lama udah tebilang enggau mayuh lagu, nyengkaum Lauk Kitai, Agi Bisi Tedai Pengerindu sereta enggau mayuh lagu bukai kelimpah ari ke nyapu menang semua kategori lagu Orang Ulu ba semekih Dayak Music Awards (Dama) 2008 ba Hotel Crowne Plaza Riverside, enggau Anugerah Muzik Dayak (AMD) 2010 di BCCK suba. Iya mega bisi dikangau merindang bala mayuh ba pengerami renggat penudi AMD 2012 di Unimas. Taun 2016 ba pengerami sebaka Urai nadai dipeda enggau. Nya meh taun penudi AMD diatur.

“Kekadang ukai salah penanyi tang penyalah tauka penyaru orang ke ngaga leka lagu nya, laban komposer lirik ke ngaga lagu, ukai penanyi. Bala kami penanyi mina belagu aja,” ku Urai taja pan madah iya empu mayuh ngaga leka lagu ungkup diri empu enggau sekeda penanyi bukai, kelebih agi penanyi Orang Ulu.

Penemu Urai tu mega dipesetuju penanyi veteran Datin Senorita Linang lebuh ditanya penemu ulih penulis apin lama.

Ketuai Gerempung Artis enggau Pemusik Dayak (DAMA) Datuk Snowdan Lawan ke mega nyadi Penulung Menteri Lumba enggau Main mega sama setuju enggau penemu seduai nya tadi.

“Leka lagu ti enda manah reti tauka negatif tau ngemaruhka lagu Iban. Bala penanyi patut nyeliahka diri ari ngena leka ti bakanya. Mayuh jaku ti manah patut dikena ari ti ngena leka negatif, leka mai reti kurang meruan,” ku Snowdan lebuh ditanya penemu ulih Sada Sarawak dulu ari tu.

             NYELAK TIRU

Ka tambah nya Snowdan mega bisi ditanya penemu pasal ulah nyelak tiru tauka ‘celak tiru’ dalam industri musik Dayak, kelebih agi musik Iban.

“Agi mayuh bendar orang ke ngaga salin VCD tauka CD ari original enggau nadai kemendar laban sida keran deka ngulih untung jampat sereta ungkup ka sida empu aja.

“Pekara tu ukai mina ngemai pengerusak ngagai industri tang nadai ulih ngenataika untung ti chukup ngagai bala penanyi ke ngelamatu udah bebendar ngemansangka diri,” ku Snowdan.

“Ngambika industri musik Dayak terus maju sereta nguntungka artis mayuh, ulah nyelak rumpak patut diketuka diatu,” ku Snowdan ke mega Kaban Kunsil Nengeri Balai Ringin.

Sebedau tu Sada Sarawak kala mantai ripot pasal sekeda bala artis Iban ke sama sepenemu enggau Snowdan dalam pekara nyelak rumpak tu.

Penanyi enggau tukay studio rekoding lagu Iban Jennarino Jeraki bisi betemu enggau Sada Sarawak dulu ari tu, megamadah ulah nyelak tiru VCD album lagu Iban siti penanggul besai dalam dagang industri musik Iban. Pengawa orang ke mina ngerunding diri empu deka ngambi untung jampat nya balat bendar ngerusak dagang nyual album VCD lagu Iban.

Jennarino ke begulai enggau indai tuai iya Jenny Tan (JT) sama ngempu Golden Pearl Recording Studio (GPRS) di Kuching ditu madah sida keran bendar deka ngemunaska ulah orang ke bakanya, tang nadai tentu jalai laban ukai siku dua aja.

“Diatu dagang kami berupai bendar surut bebanding enggau dua tiga taun ke udah. Enti suba, kami senang aja nyual siti album ngagai lima enam ribu, diatu ngagai tiga ribu siti album pan pedis,” ku iya lebuh betemu enggau Sada Sarawak dulu ari tu.

Penemu tu mega dipesetuju ulih siku agi penanyi enggau tukay studio rekoding ari Sibu, iya nya Cikgu Lembat Imban ti dikelala agi enggau nama Embat Lala, iya nya orang ti ngempu Panggau Buluh Pengerindu (PBP) Studio Productions. 

Iya ngarapka ketuai DAMA Snowdan enggau bala komiti lengkas ngemutarka sekeda pekara ti nekul pemansang industri musik Dayak.

Kerekai musik kitai Dayak diatu, ku Embat, sigi udah meraka sempadan ke Brunei, ke Semenanjung lalu anang nyebut agi, ke Kalimantan laban bala Dayak di menua nya endang udah maju dalam industri musik sida kelimpah ari ke bisi lebih 8 juta bala raban bansa Dayak di Kalimantan Barat.

“Nya alai nadai kebuah bala artis kitai enda ulih idup senang lantang ari untung ulih sida ari musik enggau lagu sida enti penyakit riman nyelak tiru tu ulih diputarka,” ku Embat lebuh berandau enggau penulis apin lama.

Ungkupka penemu bala pemacha mayuh DAMA udah mujur deregister dalam taun 2010 suba lalu udah ngatur empat iti AMD, iya nya dalam taun 2010, 2012 2014 enggau taun 2016 suba. Patut dalam taun 2018 suba endang seiti agi AMD tang bisi penanggul mimit ngujungka iya enda nyadi. Lalu kenyau ari pun taun 2020 tu tadi tegal Kubit (Covid-19) pengawa nya lalu tejanggal, enda ulih dipejalaika. Penanggul tu nyadi sereta nekul mayuh atur rami nyentukka saritu.