Cherpan Lalau Pendiau: Nakhoda Sebaginda Bujang Seduai Anak Chuik Keramat

Tusun Ke-7

CHERPAN Lalau Pendiau: Nakhoda Sebaginda Bujang Seduai Anak Chuik Keramat ti dikeluarka dalam Tusun-6 minggu nyin kemari nyerita pasal Sebaginda Bujang ke kena uji Perintah Raja Sedinang Indu, ke alai iya diasuh meresa panjuk buk ti ditanka ba stadium di Mengeri Raja Sedinang Indu. Nama utai ti nyadi jam Nakhoda ke meresa panjuk nya, nya mih sentang cherita ti deka dibacha kitai dalam minggu tu ba Tusn-7 tu.

“Seharitu, kitai amba rayat di Mengeri Sedinang benasit amat laban bisi diundang siku temuai ke dipebasa ari Panggau Libau. Nama iya Sebaginda Bujang, ke baru bulih gelar ‘Nahkoda’, diberi Baginda Raja kitai ditu. Endang ka jelan pengawa selama, kitai seharitu ngatur pekit manjuk ngena buk dikena kitai nyambut penatai temuai lelaki ke bisi rembus ngagai mengeri kitai kitu. Nya alai, diatu pekit tu berengkah.”

Jaku penerang ari buluh balang dikelembung orang mayuh enggau panjung ti ngenying teranggap penginggar, nya ti ngasuh tanah asai ke terangkat.

Semua bala indu ke enggau bepekit, nyengkaum Raja Sedinang Indu-empu, lalu berunyut baka sabut tabu tali, bebatak baka unak wi dirunti, nyingkang betandai ngagai tengah padang, ngambika lalu ngetan panjuk buk enggi diri-empu. Udah kemas panjuk ditan, sida lalu mulaika diri ngagai penuduk diri-empu.

Mensia mayuh berengkah jenuh. Tegeram. Sengian di sekayu padang. Tau disemaka. Didinga jarum dipatah, empa penyunyi utai.

“Diatu, semua panjuk udah ditan. Nya alai aku enggau basa ti besai ngangkatka iya ke Dibasa, Nakhoda Sebaginda Bujang nurun ke padang, ngeraun semua panjuk ti baru udah ditan sekejap tu tadi. Enggau basa ti besai, kami ngangkatka nuan, Nakhoda,” ku buluh balang sambil meremi meri basa, minta Nakhoda nurun ke tengah padang pekit.

“Bah, nama tuju pekit tu, Raja?” tanya Nakhoda, laban ati iya irau enda nemu tuju pengawa ti ngeraun panjuk buk ti erates-ratus mata ditan bala indu di sekayu padang.

“Nadai nya ibuh ditanya, apai. Tak turutka aja perintah Raja,” ku telai Anak Chuik Keramat. “Tang aku bai enggau nuan, enggaika nuan enda nemu nama utai ti nyadi ba benung padang din lagi.”

“Akai-rai! Kati ku ngeraun tu enda ditemu tuju. Betuju ka munuh tua kini pengawa bansa tu!”

Tudah tuai lalu berunyut, kekalik nyandik sangkar, mansang ke tengah padang mai penyerut ati. Iya diiring seraban soldadu. Ketuai soldadu lalu minta Nakhoda bejalai meraka semua panjuk udah semata, semata. Sereta iya teperakaka panjuk ti kelima ratus, iya nya panjuk ti ditanika ba tengah-tengah padang, panjuk nya lalu ngingkas sereta lalu nyintak betis Nakhoda Sebaginda Bujang. Nya panjuk enggi Raja Sedinang Indu-empu. Sereta tepedaka Nakhoda disintak panjuk, orang mayuh lalu gaga, chapuh riuh. Nyau tegugup munyi langit sepiak laban gu ketawa, sentaie, terais, panjung enggau tempap jari mensia sekayu padang.

Nyadi Nakoda nyau temati kutu, kekalat enda nemu utai ti patut agi dikereja diri lebuh udah kena sintak panjuk baka nya.

Sebedau pekit nya dibuka, orang nadai mesuka ngagai iya pasal tuju enggau guna pekit nya. Tang lebuh udah kena sintak panjuk buk enggi Raja Sedinang Indu nya, nya baru buluh balang nerangka ngagai orang mayuh enggau pengaga ati. Penginggar nyawa iya ke meri penerang nya bedauh nyilup remang munyi ti tau ngeraratka petakang Bintang Tiga sereta Bintang Regang Selatan.

“Ampun enggau sembah ngagai Baginda Raja Sedinang Indu sereta enggau temuai dipebasa Paduka Nakhoda Sebaginda Bujang enggau amba rayat mengeri tu. Mai ati ti baruh tang disempulang enggau basa ti besai, aku madahka, nyerumba maya ke embap, hari ke sedap, bulan ti lindap tu, semata panjuk udah nyintak. Nitihka undang-undang ti dikena di Mengeri tu, sebarang sapa ti disintak panjuk nya mesti lalu diambi orang ke empu panjuk nya ke laki. Nyadi sekali tu, Paduka Nakhoda Sebaginda Bujang udah kena sintak panjuk enggi Baginda Raja Sedinang Indu, nya alai kenyau ari entika tu, Paduka Nakoda Sebaginda Bujang dipinta nyerahka diri jadika laki Baginda Raja Sedinang Indu,” ku tempalau buluh balang.

Amba rayat ke bepuluh-puluh ribu, ke duduk belapis-lapis magar padang pekit ke ngemataka pekit, lalu kachuh baru laban gagaka Raja sida udah bulih laki. Tempap jari, terais, ketawa enggau panjung orang ke dia nyau ngasuh tanah asai ti begegar ngilah Sebayan kin.

“Apu, kelanjur amat kereja baka tu. Tu nama dih penyadi. Nadai jalai aku tu tau bebinika Raja, laban bini diri endang meruan di menua. Enchelegit nama bini aku dih. Ni alah bebini dua pan. Pejuru kami Panggau nadai siku ditemu aku kala bebini dua, Raja,” ku Nakhoda bejaku nguing ngagai Raja Sedinang Indu.

“Pendingka aja atur orang dih, pai. Tua tu ga di menua orang, atur orang ga dititih. Enda ingat nuan ka jaku orang tuai, tama pagar babi meruik, tama kampung remaung negung. Udah manah Raja deka belakika nuan. Laba besai tu, apai, anang ditulak,” ku ajar Anak Chuik Keramat.

“Pui! Beli bejaku. Enti galak, tak nuan jadi enggau iya!” lalu ditanjul-tanjul iya sangkar. Nyau tepangka-tepangka kin kitu tudah Anak Chuik Keramat ke dalam sangkar bai sangkar nya bebaring. “Balat pemagah apai. Di menua orang pen nunda pemangah iya ke di menua diri. Tussahh!!” ku putap tudah Anak Chuik Keramat ke mut-mut bejaku end inggar enggaika didinga Sebaginda Bujang.

“Anang ngeransi aku baka tu, apai. Enti majak baka tu, enda jerih parai aku diransi nuan berari. Enti aku mati, nuan pan mati mih apai,” ku Anak Chjuik Keramat serebana.

…BETAMPUNG

Oleh PINSIL SARATOK