Cherpan: Rabat

Tusun Ke-1

DUNYA tak petang ke sida Ming sebilik. Penusah udah nuntung sida sebilik. Ini Ming baka ke disadang, baru udah mutuska seput tudah tuai urung 8.00 pagi nya di Sepital Sibu. Sida sebuat benung kiruh bekira, begelumu ba mua rumah mayat.

Apai Ming udah ngaga ripot polis. Ming empu udah betelipon ngagai palan orang ke nyual rarung.  Indai Ming udah pulai ngagai rumah sewa sida ngemaska gari tudah ini Ming sereta besikap deka mulaika diri ke menua. Siku bala semak ke sama bekuli dia bisi mega nulung indai Ming besikapka  utai.

        “Ibu tu deka diswab ku polis, nya alai iya apin ulih dibai pulai diatu. Orang opis pengerai deka datai kitu lagi mai pemutus swab tadi,” ku apai Ming.

        “Rarung nya, apin ulih dibai diatu ka?” ku Ming irauka sarang ini iya.

        “Tau dibai tang tubuh iya apin disimpan,” ku apai Ming.

        “Kati deka orang opis pengerai nuchuk iya awakka tubuh iya tan enda jai?” ku tanya Ming ti berundingka ini iya dibai jauh lalu deka disenggai di menua.

        “Selama tu deka, asal kitai bisi minta,” ku apai Ming ke sikar amat mutarka penanggul ti ditapi.

        “Kati YB udah ulih dikuntik?” ku Ming.

        “Udah. Tang iya nadai ditu. Udah bejalai,” ku apai Ming.

        “Ni perengka pengangkut dikena mai tubuh iya dih?” ku Ming.

        “Nya deka diatur ulih tuan empu rarung,” ku apai Ming.

        Randau sida ngetu naka nya. Utai bekelingi dia, ba mua rumah mayat tak sunyi. Nyau ke lama randau ditampung baru.

        “Ulih ngangau ke rumah panjai?” ku apai Ming nguing ngagai Ming.    

        “Udah. Seninjik Ukik benung ba bukit deka ke pasar,” ku Ming.

Tubuh tudah ini Ming bedau agi ba troli, digalika bebejur ditudung ngena kain belachu sepital. Tubuh nya enda dipasuk ngagai bilik chelap laban enti semua utai mujur, iya deka dibai terus pulai ke menua abis laun ngalih hari lagi.

        Ming duduk nukung ba kerusi endur nganti. Runding iya terebai jauh ngagai rumah sida di Rian Mipau Umbang. 

“Kasih ini, enti enda laban sekat mindah betagang ketegal pengerekai Covid-19, tentu ini enda mati di sepital,” ku ati iya.

Iya ingatka Ukik ke diasuh nyendiaka siku babi dikena nikika bangkai ini iya. Pagi nya utai enda ulih nitihka atur diri empu laban nya bepanggai ba atur orang. Sida agi nganti ripot polis. Polis apin ulih meri ripot laban agi nganti pemutus peresa chulik idung enggau nyawa ari lutur. Rarung apin ulih datai agi nganti tuke sarang nya.

Ming arapka ini iya enda positif. Enti positif, abis cherita. Ini iya enda ulih dibai pulai ke rumah. Ini iya deka ditumbak nitihka atur sepital ba pendam alai orang ke enda tau dibai pulai ke menua. Ming nyau ngesuh sambil jari kanan iya ngaru pala iya ke enda gatal. Runding iya teingatka mayuh bendar udah kes orang baka nya. Ati Ming tusah amat. Mua iya bebali mirah. Enti nitihka, enda ini iya positif,  laban iya berubat kemari ukai kes Covid-19. Ati iya berasai berubah lantang mimit tang agi kesal. Andalka utai manah.

Jam jampat bejalai. Siti utai nadai udah belinsur telesai. Berasai lama bendar sida nganti. Tu mih utai ti dikenggai, lalu nya ga datai. Nya mih kebuah sida deka mai ini Ming pulai ke menua lebuh iya apin kena sakit suba tang laban perintah mindah betagang benung dipejalaika lalu pejalai meraka pelilih enda dikemendarka.

 Ayan semua gambar pengidup sida sebilik nyemia-nyemia ba mua Ming. Terubah suba semina apai enggau indai Ming ke bekuli apin Ming ke besai. Nyau kelama, ini iya nyau dibai nitihka sida laban enggai nejuka iya diau kediri di rumah panjai. Pengidup selalu sempit, jauh ti kala nemu penyamai. Deka enda bekuli ke mengeri, ngichaka teulihka anak belanja menggal mit.

BETAMPUNG…

Oleh JANTAN UMBAT