Bisi saum adat ngintu, masa pemati

BUJANG tebilang berani kitai Iban, niang Datuk Temenggung Kanang anak Langkau, PGBK, PGB, SP benung meri tabi ngagai gambar Rentap ba tiang pengingat iya.

ENDANG udah ditemu mayuh ulah kitai Iban ti sebaka enggau sekeda bansa bukai di dunya tu dalam jalai basa pemati.
Kitai mega endang bisi ngembuan sekeda adat asal ti berupai nyelai ari enggi mayuh bukai di menua Malaysia tang bisi saum enggau enggi sida raban Orang Ulu baka Kayan enggau Ke- nyah sereta mega enggi sida Sekapan, Berawan sereta bansa bukai di Sarawak ditu sereta mega enggau bala kitai Iban di menua Badau enggau alai bukai di Indonesia, laban nya meh endang penatai asal aki ini kitai kelia.

Nyadi sekeda raban bansa ba menua bebukit tinggi baka di Tibet, Mongolia, Taiwan, Pilipin, sekeda menua Amerika Selatan baka Peru, Bolivia, Chile, Brazil, Uruguay enggau dua tiga iti menua ba kandang tasik besai Pasifik, bisi udah ditemu ngembuan chura sereta enggau ukir te- nun kain baju enggau pua ti nyau deka sama sebaka enggau enggi kitai Iban. Mina tuju iya meh bisi bida mimit.

Lalu ukai nya aja, laban mayuh agi utai bukai ke sebaka enggau enggi kitai Iban, baka jalai pengidup sereta mega sekeda main asal. Ambika banding, baka ba menua Pilipin, bisi siti raban bansa orang menua nya ke empu jaku sebaka enggau jaku Iban kelimpah ke mega ngembuan chura kain enggau pua tenun nyau deka sebaka enggau enggi kitai Iban.

SEBAKA JALAI ADAT NGINTU

Nyadi di Pilipin, enggau sekeda menua ti udah disebut tadi, siti agi pengawa tauka adat asal ti sebaka enggau enggi kitai Iban nya jalai ngintu pemati, iya nya ngelumbung. Senentang pekara tu sekeda mayuh bansa ari Amerika Selatan udah ditemu bisi ngintu pemati aki ini sida kelia ngena jalai ti chukup sebaka enggau kitai Iban.
Munyi ti udah disebut aku tadi, ba menua kitai empu bansa ti mit-mit tauka mino- riti ba entigis sungai Batang Rajang enggau Baram, en- dang bisi ditemu ngelumbung aki ini sida kelia taja pan kemaya haritu adat nya udah diketuka, iya nya nadai dipejalaika agi. Semina atur enggau tusun adat sereta chara aja ti bisi enda sebaka enggau enggi kitai bansa.
Nyadi kenang aku dalam lambar tu, datai ari penemu aku empu, beduduk ari tusui orang ke tuai dulu suba sereta mega ari pansik. Ba menua pelilih Saratok, iya ba Batang Krian enggau pati iya, endang mayuh lumbung ti mengkang dijaga sereta diintu manah nyentukka sehari tu.

LUMBUNG PETURUN ANYA

Ambika banding, bisi tiga iku ari peturun Anya ‘Lebur Menua’ ti berasal ari Batang Melupa dilumbung. Nyadi Pengulu Bungin anak Anya seduai anak iya Tawi Bungin sama dilumbung ba tanah sida empu ba tebing Batang Krian, iya nya ba Lubuk Gagam ari ulu Jematan Krian tang ulih dikenataika ngena jalai Kaki Wong.

Pengulu Bungin endang diberi basa mati dilumbung ukai tegal iya bedengah tauka berani ngelaban munsuh. Iya diberi basa mati dilumbung beduduk ari pengelandik iya nyadi tuai, udah bekau dichiri nyadi pengulu ulih perintah Brooke kelia. Diatu lumbung nya ulih dipeda dedinggai ba atas tebiang renjam Lubuk Gagam muak ari kanan mudik Krian. Lubuk Gagam tu endang siti ari lubuk ke beberita mayuh baya ba Batang Krian.

Keba bisi sema jaku orang munyi tu: ‘Nyelam ba Lubuk Gagam, pansut ba Lubuk Mamut’. Tu kena nyema pemayuh baya entara dua iti lubuk nya ke numbas penyauh ari pangan. Mamut tu ari ulu Gagam.

Nyadi lumbung anak iya Tawi ti begelar ‘Lanang Kasih Sayang Bedindang Madang Rutan, Tawi Berani Ati Pengemudi Iban’ mega enda jauh ari enggi apai iya tang enda ulih peda ari batang ai laban iya digaga kedalam agi. Taja enda dipeda ari Batang Krian, lumbung Tawi endang semak enggi apai iya lalu muntang diabas ngena jalai Kaki Wuong/Babang ti nyimpang ba Jalai Pan Borneo.

Dulu ari, kira bisi 10 taun ke udah, endang bisi begawai lebuh bisi pengawa ngangkatka agi pemanah seduai nya lumbung nya laban bisi belanja tulung ari pengari rayat maya nya Datuk Peter Nyarok anak Entri.
Nyadi seiku agi ichit Anya, Ilin (uchu Bungin) mega dilumbung dalam Batang Assam ti bepati ba Melupa, lalu pansa jalai ngagai rumah orang Sulau dulu suba lalu numbas penyauh ari sekula Nanga Assam. Lumbung Ilin mengkang diintu bala sida sebilik nyentukka diatu.

Siti penyelai mati dilumbung tu, bala lelaki ke diberi masa pemati dilumbung nya endang dilumbung ba tanah diri empu, ukai ba pendam lalu enda begulai enggau sempar tauka pendam bala mayuh.

Nyadi ungkup penemu mayuh, Tawi seduai Ilin (bensumbar Pintu Besi) tu endang pungka lelaki ti sama enggau Rajah Brooke ngelaban Bantin ba Nanga Delok (Delok Expidition) di Mepi dalam taun 1902. Bisi ga orang ngumbai nya Cholera Expedition tauka ‘Kayau Lus’ tegal mayuh amat bala ari sepiak-sepiak parai muang ai maya bala Rajah ti nyerang sida Bantin nya. Nitih pansik, kelimpah ari Tawi se- duai Ilin, bala uchu enggau ichit Anya ti bisi dibai Rajah Brooke enggau nyerang nya nyengkaum Mulok anak Baring enggau Naing (anak Bungin diiru Jatan).

BELA AMPIT BEDENGAH

Sida empat iku nya sama bisi bulih pala, tang nadai ngelaban pemayuh ulih Mulok ke bensumbar Bandau Nulang Nanga Mepi. Naing bensumbar Naing Pengerambing Kuta, Berinau Panggau Dara. Petunggal sida Subung Bran pan tebilang berani tang iya nadai enggau orang ba Kayau Lus nya. Iya bensumbar Kala Nyepit Naka Pemisa-misa, Bunga Parapenit Ka Dujung Indu Dara.

Tawi anak Bungin tu mega dirapuh sereta digagaka lumbung laban ke nadai pulai ari menua Mindanao di Pilipin kelia, nitih pansik penulis.

Pelaba aku bala pemacha, nyangka bisi enda tentu nemu nama utai ke dikumbai lumbung sereta mega nama reti pengawa ngelumbung tauka belumbung.

Nitihka siti sereba reti jaku Iban An Iban Dictionary ari karang AJN Richards edisyen 1981, reti jaku ‘lumbung’ tu ‘rarung tauka sentubung ke enda ditumbak tang disimpan tauka ditempara dalam siti langkau tauka rumah mit’.
Bakanya mega Dictionary of Sea Dayak karang NC Scot edisi 1956 meri reti lumbung tu ‘siti sentubung endur engkah bangkai enda ditumbak tang disimpan dalam siti rumah tauka langkau mit’. Sentubung nya semina ditempara begantung ari tanah.

Nyadi pengawa belumbung tu ukai semina dikereja kitai Iban kelia tang bisi mega dikereja raban bansa bukai di menua kitai ditu sereta enggau di menua tasik maya nya menya tauka dulu agi munyi ke udah disebut aku dulu tadi.
“Ba raban bansa Iban, semina orang ke udah bulih nama tampak rita bedengah, nyadi pungka lelaki tauka tinggi pendiau bulih reta tengkira aja tau diberi basa mati dilumbung.

“Bisi mega orang ke dilumbung nya laban iya ketuai mungkal menua tauka sida ke udah pegari nama ba siti-siti pengawa “Kitai Iban kelia meri basa ngelumbung aki ini ke patut dilumbung ngichaka semengat sida nya agi ulih ngemataka bala uchu ambu sida ke agi idup,” ku uchu Subung, iya nya Datuk Musa Giri, 78, lebuh ke bekenang enggau penulis pasal pekara tu apin lama.

Musa tu siku ketuai Iban ke kala megai pengawa besai ba opis perintah, nyengkaum nyadi Chairman HDC (Housing Development and Commission) ngagai pun taun 1990an menya. Diatu iya ngemeranka pengawa dagang.

SUKUNG ATUR NGELUMBUNG

Pengarap lama orang tuai kelia, iya nya enggi bansa kitai Iban munyi ke udah disebut dulu tadi, iya nya ngelumbung orang ke parai, udah bulih sukung ari siku intelektual bansa Jipun penama Motomitsu Uchibori dalam siti thesis Doctorate of Philosophy (PhD) iya The Leaving of This Transient World: A Study of Iban Eschatology and Mortuary Practices (1978).

Uchibori madahka pe- ngawa bebasaka orang mati ngena jalai lumbung nya siti jalai ngemesaika pengingat enggau guna orang ke udah nadai, udah lesi bebadi laya sulai.

Ngena jalai lumbung tu, mensia ke agi idup, ke ditinggalka orang ti parai nya sigi ngichaka semengat orang ke parai nya agi ulih tinggal lama begulai sama enggau sida, enti enda ulih selama-lama.

Laban lumbung nya ngundan bangkai orang ke udah parai, kitai ke agi idup tu agi ulih ngingat sereta begulai enggau sida lebih ari sida ke udah ditumbak lalu diau di Sebayan, pia ku penerang ari Uchibori.

Mati belumbung tu ngering sereta balat agi nyaguka peninggi penuduk lelaki ba dunya kitai Iban. Reti nya, semina lelaki aja ke dilumbung.

Dalam reti ke bukai, lumbung ungkup lelaki aja. Lalu lelaki ke mati sereta diberi basa dilumbung nya ukai sebarang lelaki, tang lelaki ke udah pegari nama nyadi pungka lelaki (tau mega dikumbai pungka laki) udah bedengah tauka sida udah nyadi tuai orang mungkal, berimba menua, lalu matak orang mayuh pindah mungkal menua baru.

Nyadi ba menua Sarawak, pungka laki ti chukup tebilang berani diberi basa lumbung nya niang Rentap. Lumbung iya di Bukit Sibau, Ulu Wak di Pakan, digaga sereta disungkakka manah agi ulih perintah Sarawak kena 28 Oktober 1989 suba. Pengerami tu digulu ulih bala menteri enggau tuai raban bansa maya nya.

Oleh TELESA EMPERAN