CHERPAN LALAU PENDIAU:Nakhoda Sebaginda Bujang Seduai Anak Chuik Keramat

Tusun Ke-8

CHERPAN Lalau Pendiau: Nakhoda Sebaginda Bujang Seduai Anak Chuik Keramat ti dikeluarka dalam Tusun-7 minggu nyin kemari nyerita pasal Sebaginda Bujang ke kena sintak amba panjuk enggi Raja Sedinang Indu, ke ngujungka iya lalu diambi Raja Sedinang Indu ke laki. Aram mih kitai bela macha tampung cherpan tu ba Tusun-8, ngambika kitai bela nemu pasal untung nasit Paduka Nakhoda Sebaginda Bujang lebuh iya udah jadi enggau Raja Sedinang Indu.

“Pui! Beli bejaku. Enti galak, tak nuan jadi enggau iya!” lalu ditanjul-tanjul iya sangkar. Nyau tepangka-tepangka kin kitu tudah Anak Chuik Keramat ke dalam sangkar bai sangkar nya bebaring. “Balat pemangah apai. Di menua orang pen nunda pemangah iya ke di menua diri. Tussahh!!” ku putap tudah Anak Chuik Keramat ke mut-mut bejaku enda inggar enggaika didinga Sebaginda Bujang.

“Anang ngeransi aku baka tu, apai. Enti majak baka tu, enda jerih parai aku diransi nuan berari. Enti aku mati, nuan pan mati mih apai,” ku Anak Chjuik Keramat serebana.

Nakhoda Sebaginda Bujang senganging ngumbai diri enggai bebini. Sangkal iya, ukai ketegal Raja enda bajik, enda kaya, enda pandai, tang laban iya enda tebuaika Enchelegit ti meruan nganti pemulai iya, mai raba ramaniah ke sera.

Taja keterubah penemu tudah tuai matang, tang lebuh nyau kepuas-puas dipujuk Raja Sedinang Indu enggau ditimuh Anak Chuik Keramat, nyanggup ga Nakoda bebini. Iya lalu dibai Raja pulai ke istana. Datai di istana, bala pemesai istana, inang, lamat enggau berekat sereta seisi istana angkun bendar ka iya, lalu diinta sereta disembah nyadi Raja Lelaki.

Raja Sedinang Indu lalu ngerah bala menteri iya, merintah sida nengkiraka pengerami nikah iya enggau Nakhoda Sebaginda Bujang, bujang berani ari Panggau Libau. Nya alai, pengelama tiga hari tiga malam orang berami makai enggau ngirup, belagu enggau betanda, bebuti enggau betundi, mencha enggau bekuntau. Semina siti aja pekara ti ngenachatka pengerami nya, laban bala indu nadai bala lelaki enggau bepandang mata, kelimpah ari Nakhoda Sebaginda Bujang, ke endang udah di tangan orang, munyi ku leka dindang.

Sehari udah bekau pengerami beselamat, nya baru Raja Sedinang Indu madahka utas pengawa ngagai Raja Sebaginda Bujang.

            “Pengawa kami di menua tu ti ngetan panjuk buk nya endang bisi tuju ti besai, Raja Sebaginda Bujang. Kebuah pia sebarang sapa lelaki ke kena sintak panjuk, iya nya mih ke lalu diambi ke laki indu ke beempuka panjuk ti nyintak nya. Tang sejeman-jeman tu panjuk kami ditu enda kala nyintak, nya kebuah kami ditu lalu enda teulihka laki. Baru nuan tu mih lelaki ti keterubah iya kena sintak panjuk kami. Nya kebuah nuan enda tau enda diambi aku ke laki laban nuan kena sintak panjuk aku.

            “Nyadi buah raba ramaniah ti digiga nuan endang bisi dikembuan kami ditu. Tang kami apin ulih magi iya enggau nuan diatu laban nuan enda tau enda dulu diasuh kami pegi ngagai menua Raja Merom, laban apai Raja Merom, iya nya Raja Meru, diatu udah mati. Rayat di menua nyin diatu benung nguji ngerebut lanting Raja Meru, iya nya pintu gemuru mas, ari jari Raja Merom.

GIGA ORANG BUKAI

Nya alai, ka semuti nuan lelaki di menua tu, ari nya aku minta nuan ngarika menua kitai tu awakka enggau orang berebutka pintu gemuru mas nya.”

            “Apuuuu, tu baru parai nyawa laki Enchelegit tu dikeduan nuan baka tu, Raja,” ku Raja Sebaginda Bujang, tusah ati tekenangka pemar pengawa ti diperintah Raja Sedinang Indu dikereja iya. “Udah ga aku tu ninggalka sida Indai Duat di menua din, datai ditu agi ga diperintah pegi ngagai menua Raja Merom, nyabung diri enggau orang belayaka pintu gemuru mas nya. Pengawa munuh ti diasuh nuan kereja aku tu, Raja. Utai ke dama pintu gemuru mas nya dih aku enda ngelala, kati ku aku nemu tak berebutka iya enggau orang. Eh, enda aku ibuh enggau, Raja. Enggai aku. Ukai enggai sengapa. Enggai beamat-amat. Enda aku berani napi Raja Merom. Manah nuan ngiga orang bukai nyilih aku.”

            ‘Eee, anang nuan munyi nya penemu, apai,” pia ku Anak Chuik Keramat, “Kati nuan tembu tak enggai kin, ngelanggar perintah Raja. Ila nuan dikumbai orang buyan. Tak kumbai orang ditu ngemuyan nuan nya magang-magang kitai ke di Panggau Libau din ila. Kin ke mih, apai. Mesti lah bisi daya tua ngulihka pesaka nya lebuh datai din ila. Ti nuan takut, ila aku enggau nuan.”

            “Bejaku enda ngipakka penyai anak gamal!” ku perak Sebaginda Bujang. “Perut dih nyau tining-tining ngapa, nyau baka ke ka meretas!”

“Gamal tu amat dipeda nuan jai, apai, tang ati tu tak nadai nemu utai diketakutka munyi nuan nya,” timbal Anak Chuik Keramat. “Datai din ila bedaya.”

            “Jaku ngapa! Enti aku tu ke bulih tiga jengkal ruang belakang nadai nemu daya ngerebut pesaka nya ari Raja Merom, telah agi nuan ke semina mesai tinga nya. Ya ga nganjung diri parai dibunuh Raja Merom enti tua kin.”

‘Enda parai, apai. Nadai iya tak berani munuh kitai sengapa. Raja Merom pen takut mih ka undang-undang. Iya pan mensia baka kitai tu mih, ni iya tak deka munuh tua enda beradat,” saut Anak Chuik Keramat.

Betampung…

Oleh PINSIL SARATOK