Cherpan:Rabat

Tusun Ke-2

TU udah tinggang penusah, ukai mimit ungkus. Ungkus mai tubuh ini pulai enggau ungkus rabat. Tu dih baka, bedau temu gaya. Ukai ngajihka rangkang ngachuk mata, ukai ngadang tulang nebak nyawa. Nama-nama daya, nama-nama kira enti ini Ming tak enda dikemendar dibai pulai ke menua?

Peluh beteresit ba kening Ming. Tak bisi berasai angat hari, tanda mata panas udah niki. Hari udah tinggi. Munyi utai bekederu ke kiba, ke kanan; munyi kerita mansa kin kia. Bau ubat klinik seruran ngaba, ngachau asai idung.

Ming sekali dua nyeling ngagai apai iya. Apai iya pan seruran tegenung. Tentu runding apai iya enda jauh ari runding iya. Apai Ming nilik jam ba dekuan iya. Kening iya bekeriut. Diambi iya kain tula lalu palit iya peluh iya ti beterenjui nitik ngagai kuyu iya.

“Udah pukul 10.00 lalu apin ga polis tauka lutur datai. Ah, nama penyadi tu lagi?” ku ati iya. Perut iya bisi didinga begeriuk. Randu udah begantung. Pagi tadi enda sempat ngirup. Ming udah dua tiga kali nyenguk agu semak nya. Enda temu asai; asai ke deka kemi, asai ke deka bira.

Jam nya dinga deru kerita deduru nuju alai parking di mua rumah mayat nya.  Sebuah mutu landcruiser belinsu biru tuai ngetu ngejut. Peda siku orang polis bepekayan penuh kekibing mai keretas di jari iya. Udah nya pansut siku da orang ke tentu lutur laban bekelaika perengka pemending seput ti kekalik ba rekung enggau bau iya.

“Sapa Daba?” ku polis.

“Aku,” ku apai Ming rebansak semak Tuan Polis.

“Ini Ming tu nadai ditemu positif. Iya ulih dibai ke menua tang anang enda bejimat. Mesti nyaga SOP,” ku lutur.

“Tu surat pemendar kita mindah meraka pelilih,” ku Tuan Polis.

BANGKAI MANDI SERETA DIGARI

“Puji Tuhan. Terima kasih Doktor. Terima kasih Tuan,” ku Daba, apai Ming.

“Sama-sama,” ku lutur enggau Tuan Polis nyaut bereta lalu sama dedegir semak sida dia.

“Tuan doktor, minta ampun. Kati ulih kita nuchuk tubuh ini Ming tu enggau ubat tan enda jai?”

“Ulih. Sida deka datai nuchuk lagi,” ku Lutur.

Betul bendar, enda lama udah nya dua iku orang ke gawa ba bilik mayat nya datai. Seduai iya lalu nadai muai jam lalu ngirit troli ke dalam bilik. Jam nya nasit bendar indai Ming nuntung datai mai gari ini Ming. Entah sapaka alai iya nepan? Ku ati apai Ming.

Tudah ini Ming lalu diberi mandi sereta digari. Indai Ming enda ulih ngetatka ati ti sinu, lalu rung-rung udah iya muka kain belachu ti ngebap ini Ming. Indai Ming enda bedulika orang; majak nyabak sambil ngari indai iya. Kasih. Tang nasit ga ulih dibai pulai ke menua. Eni enda pia, enda aku nemu agi, ku ati iya.

Udah ini Ming tembu digari, semua diasuh pansut ari bilik nya laban pengereja pengawa dua iku nya deka nuchuk iya enggau ubat. Bau ubat nya bisa. Bisi berasai bepedi mata Ming enggau indai iya ke semak dia.

Mujur bendar semua pengawa nya nadai utai ngeribat. Troli lalu ditarit keluar baru. Sida nganti rarung datai. Doktor enggau Tuan Polis nyau madahka diri mupuk.

“Anang enda ingat nyaga SOP di rumah panjai. Polis Saratok bisi datai ngabas kita kin,” ku Tuan Polis.

  “Au, tuan. Terima kasih,” ku sida semua nyaut.

Enda datai 10 minit udah nya, peda van ti mai mayat datai. Dalam nya lalu bisi siti rarung, numbas iya pemanah. Taja pia, beribu mih rega iya. Ming enggau apai iya sereta sida sebilik udah nyendiaka belanja dikena meli perau ini iya. Endang udah nyendiaka penabat penusah baka nya nyadi.

“Terima kasih Tuhan. Semua utai tu mujur,” ku telai ati Apai Ming ingatka Petara, Allah Taala.

Tubuh ini Ming lalu disimpan sida sebuat dalam rarung tang tudung rarung nya enda ditutup awakka ulih dipeda sereta enda salah ngelaban atur rumah panjai lebuh ditikika din. Tubuh nya disimpan ngena sembiang dalam ati. Sida sebuat nadai ulih nyembiangka orang mati.

Betampung…

Oleh JANTAN UMBAT