NOVEL TERUTU JEMU AMBUN LEMAI

MILIH GANTI MALIN TEMUAI

Benung sida agi berandauka hal lemetak, peda Christopher gegesah datai ngampir sida. Cikgu Dayang lalu betemu enggau iya.

“Ya, Christopher, nama berita nuan? Nuan gamal bisi utai deka dipadah,” tanya Cikgu Dayang.

“Ya cikgu. Aku diasuh ketuai kami madah ngagai kita, malin temuai kami bisi hal berat ti ngasuh iya pulai ke menua enggau jampat. Nya alai kita nadai malin ari hotel ngarika hotel kami minta ampun,” ku Christopher.

“Oh, enti baka nya…,” ku Cikgu Dayang. Bedau apus jaku iya, Christopher lalu nyelepak baru.

“Enti kita deka majakka program kita ke deka matau menua, kita mesti bisi malin kita empu. Jangka aku antara kita, tentu bisi orang ke nemu pasal utan enggau rampa menua ulu.”

“Ah..bisi jangka aku,” ku Cikgu Dayang ke lalu merening Pengajar Edward.

“Au, enti baka nya, nadai salah kita majakka pejalai kita nya, tang anang enda bejimat-jimat. Taja pia, Tuai kami madah, enti kita kin ngati kediri, hotel nadai betanggungjawap ke apa-apa utai nyadi. Ukai aku ngajihka rangkang ngachuk mata. You go at your own risk,” kemah ku Christopher ngelempaika tanggung pengawa nya ngagai sida temuai nya empu.

“Okay Cikgu Edward, kati ku runding nuan?” ku pengajar Melayu biak nya. Iya bisi dipeda baka ke kesal mimit. Baka ke bisi pengirau. Ukai ga iya enda arapka Pengajar Edward tang ni nya baka endang malin hotel empu. Ni pengajar Edward nemu utai di ulu din, ku ati Cikgu Dayang.

“Ba runding aku kitai majakka program kitai taja pan kitai nadai malin ari hotel. Kitai benasit laban kitai bisi Nadia. Kesatu, iya endang orang menua tu lalu teleba pasal utai di menua tu. Kedua, iya endang tuai nembiak. Nya alai, ba runding aku, iya ulih ngereja pengawa nyadi malin kitai.

Ketegal nya kitai semua anang takut, anang irau. Aku chukup arapka Nadia ulih. Of course aku pan nulung tang aku tu Iban ili. Nya alai mayuh utai di menua ulu tu enda ditemu aku, nya alai nya mih alai Nadia chukup beguna ke kitai,” ku Pengajar Edward.

“Aku amat orang menua tu tang aku nadai udah belajar nyadi malin temuai. Aku..aku..kurang confident lah!” ku Nadia.

“Anang baka nya, Nadia. We trust you,” ku Madam Tan jampat bejaku meda Nadia kakang.

“Ya, kami arapka nuan ulih, please,” ku Cikgu Dayang.

“Come on Na. Anang ngemuntanka pejalai kitai,” ku Cikgu Edward.

Bala schoolmate Nadia pan bela bekerengai meransang iya.

“Okay. Aku besedia deka nguji enggau naka ulih ngereja nama utai ke ulih awakka kitai enda ngemuntanka pejalai kitai ke deka matau menua, but..but,” ku Nadia enda teabiska ayat jaku iya.

“Apa but lagi?” ku Jamilah.

“I’m not responsible for any mishaps or for any short comings. Do you all understand that? Don’t blame me if I’m not a good guide,” kemah ku iya. Baka ke udah dirampit penyakit Christopher, bejaku Orang Putih, madahka diri enda betanggungjawapka nama utai ti tau nyadi enda disadang. Kaban iya enda tau ngutuk iya enti iya ukai malin ke manah.

“Oh, of course, we cannot blame you for anything. I can assure you,” ku Cikgu Dayang sama jaku Orang Putih, madahka orang nadai tau ngutuk tauka nyalahka Nadia ka sebarang utai ti nyadi.

NADIA NYADI TUAI RABAN

“Enti pia, aku nguji mih. Then, I am honoured to be of service to you all,” ku Nadia madahka diri besedia nguji nyadi malin temuai. Tak nyentuk agi asai ngena jaku Orang Putih.

“Oh, thank you Nadia. Good girl. That’s the spirit. Baka nya lah orang. I am proud of you,” ku Cikgu Dayang ke balat gaga meda perangai menyadi ambu iya nya ke besetuju deka nyambut pengawa nya.

Bala sida sekelas ke endang rinduka Nadia bela gaga lalu betempik jari enda ngetu-ngetu. Nyau munyi api ke makai reban madang buluh.

“Okay, sebedau mupuk, nyangka malin kitai bisi utai deka ditesau ngagai kitai. Kitai tu deka masuk ke dalam utan. Amat mih kitai tu udah ba Abad 21 tang menua ke ditujah kitai tu lagi endang menua asal Iban. Lebuh bejalai di utan tentu bisi penti pemali tauka pantang larang ti mesti ditemu kitai awakka kitai likun. Aku tu amat bansa Iban lalu pengajar kita tang penemu aku pasal utai nya mabu amat. Nya alai aku minta Nadia ke endang anak asal Lubok Antu lalu ngembuan penemu pasal mayuh pekara bekaul enggau adat asal Iban, nerangka ngagai kitai pasal pekara ke balat beguna tu,” ku Pengajar Edward.

“Terima kasih sir, nundi aku pengajar tu. Nadai aku nemu munyi ku nuan nya dih,” ku Nadia ngemaruhka diri. Endang gaya Iban, balat ngemaruhka diri. Pengajar nya asai ke bisi masu iya. Tak bisi ngejik asai ba Nadia. Bisi asai enda nyamai Nadia, asai ke bisi makai tubai langkung.

“Alau mih Nadia, terang enggau ngelansa. Kami semua arapka nuan, nya alai nuan anang sanggu,” ku selepak Cikgu Dayang.

“Okay, cikgu-cikgu enggau kitai sekelas. Aku madahka utai tu belalauka utai ti diajar sida aki ini enggau apai indai aku lebuh agi mit suba lalu dikingatka aku. Sekeda utai tu nyelai munyi lalu asai ke enda ulih dikarap kitai, tang aku minta ampun, anang ngelaban iya.

DISIPLIN DALAM UTAN

“Bisi 7 pekara ditu,” ku Nadia. Bala bisi tekenyit lalu beperening pangan diri. Alit ati sida meda Nadia tak jampat bisi utai dipadah. Ukai iya bisi sedia ku ati sida.

“Kitai mesti bisi disiplin lebuh dalam utan. Kitai mesti bebasaka rampa menua ke ditujah, ditengah kitai. Ku orang tuai, tiap-tiap endur di babas enggau di kampung endang bisi orang pengibun iya. Nya mih kebuah kitai enda tau enda ngembuan basa enggau penyiru, enggaika orang tauka antu ke nyadi pengibun nya tau ringat ngagai kitai lalu ngemunka penusah.

“Keterubah iya, kitai enda tau chabul mulut tauka changka bejaku. Anang sebarang utai disebut kelebih agi pasal makai enggau ngirup. Kitai anang madahka diri deka makai tang ngena jaku kelaung. Kitai deka ngintu diri, matahka lengan tauka ngetu. Tu enggaika puni. Kitai enda tau bemain enggau jaku tu. Iya agi bisa ba menua ditu. Enti puni, mayuh penusah tau nyadi. Kitai tau dianu mayuh macham utai. Aku enda nyebut chunto iya.

“Kedua, kitai enda tau manjung beraraka utai laban kitai tekenyit. Ambi ke banding, enti meda ikan mayuh, anang lalu nyebut, Apu, naka pemayuh ikan. Enti nya disebut, ikan tau lalu nadai dipeda agi laban menua agi latung.

“Siti agi, kitai enda tau chabul mulut enchama jelu tauka ular. Reti nya, kitai enda patut menchabar jelu siga laban iya tau berantu lalu tau nganu kitai laban taja sida dikumbai jelu tang sida nemu jaku kitai. Ambi ke banding kitai manah agi ngelaung nyebut remaung tang nyebut iya datu. Baka nya mega enggau jelu ai, iya nya kaban bujang senang, baya, kitai nyebut iya aki. Nadia enda nyebut nama kedua-dua nama jelu nya tang nyepil iya.

“Ketiga, anang sebarang utai dijeput dalam babas, kelebih agi enti bisi nemu buah ti nadai pun iya dia. Nya dikumbai orang taju remaung..eh enda tau disebut. Ila becherita panjai agi. Enti agi kelia, enti orang buya ngambi taju nya, orang nya deka dianu jelu mangah ti berantu. Iya tau tak bisi sebarang maya, nadai temu penatai. Kitai ke Kristian enggau Islam nyangka enda arapka tu, tang anang kelanjur jaku.

“Keempat, anang beserara ari pangan diri laban dalam utan kitai mudah tesat. Dalam kampung kitai tau tesat nitihka orang ke kumbai kitai pangan kitai tang orang nya utai bukai. Nya sebansa antu ti mit dalam kampong, antu kamba, ti suah mai orang tesat. Eh, aku enda ibuh becherita ka nya. Ila kitai tau becherita.

“Kelima, enti kitai enda tetatka diri lalu ka kemi tauka bira, kitai mesti nudung ai kemi enggau pemira kitai enggau daun tauka rau sebedau kitai ninggalka iya, enggaika kitai dikachau orang tauka makluk alus ke nguan endur nya.

“Keenam, di serantu jalai, enti kitai ngasaika diri balat ikak lelak, lalu lebuh kitai tepansaka daun lemba, kitai nyimpul daun nya awakka jalai kitai tau pandak.

“Ketujuh lalu kepenudi, enti meda ai sungai balat beresi lalu kitai lalu nuchung ngirup, nya enda tau, enggaika idung tauka nyawa kitai ditama lintah. Tu ulih diseliah laban kitai bisi bebekalka ai dibai diri magang. Nadai kebuah kitai ngirup ai sungai.

“Bisi kita lalu belabuh takut peda aku. Tang anang irau enti kitai siru, kitai bejimat-jimat, kur semengat, kitai besampi lalu sembiangka kitai dilindung Petara lalu kitai nadai apa nama. Come on you guys! Cheer up! Don’t panic. Everything is going to be alright, Okay?” ku Nadia ngujungka jaku pesan iya.

“Okay!” ku bala mayuh.

Nadia lanchar amat nerangka nya. Nadai pimpat. Semua nya endang peneleba ke dikembuan iya kenyau ari mit. Kenyau ari baru ada, nyau ngemesaika diri diau di utan, diau di babas. Pasal jelu ke empu taju enggau antu ke suah ngasuh orang tesat nya enda dicheritaka iya laban enggaika bala takut balat agi.

“Okay! Kitai mupuk. Nadia dulu. Iya mih nyadi malin temuai kitai,” ku Cikgu Dayang.

Bala sida bela betempap jari. Balat gagit. Ma dipelawik ke belakang. Kaki ngelangkah belabuh nyingkang. Ati sida lantang. Mimit pan nadai kakang.

Oleh JANTAN UMBAT