Lori tetungkup,deriba mati

TETUNGKUP… Deriba lori tanker minyak sawit mati pengudah lori tekelinchir sereta labuh ke dalam lebak ba Bukit Remix, Jalan Murum, Belaga kena Hari Dua ke udah.

BINTULU: Bangkai deriba sebuah lori ke tekelinchir sereta labuh ke dalam lebak 150 neter penalam ba Bukit Remix, Jalan Murum kena Hari Dua mujur ditemu kena Hari Tiga ke udah.

Mangsa, Dominic Labu, 49, ditemu tim Nginga enggau Nyelamat (SAR) urung 300 meter ari endur lori tanker nya ke labuh.

Nitihka Opis Nasat enggau Neritka Kuasa Trafik Sarawak Superintenden Alexson Naga Chabu, bini mansa ngaga ripot polis kena Hari Tiga ke udah pengudah nerima kangau senentang penusah nya ke nyadi urung pukul 10.30 pagi kena Hari Dua ke udah.

Ku iya, nitihka penerang mansa agi bedau ditemu maya ripot nya digaga sereta ngasuh polis nginga mansa.

Pengudah nya sida iya madah ngagai Balai Polis Belaga, Bomba enggau Opis Ngetanka Menisa Mayuh Malaysia (JPAM) ngambika nginga deriba lori nya.

“Urung pukul 5.00 lemai kena Hari Tiga ke udah, tim SAR mujur tetemuka mansa di dalam lebak urung 150 meter penalam.

“Bangkai iya tepelanting pansut maya penusah bebadi nya nyadi sereta anyut ditabanka minyak sawit ke pansut ari lori ba tisi parit,” ku iya maya meri penerang kena Hari Tiga ke udah.

Ku Alexson, bangkai mansa udah dianjung ngagai Hospital Bintulu laban deka ngagai pengawa ke patut.

Kes nya agi benung ditasat nitihka Seksyen 41 (1) Akta Pengangkutan Jalan (APJ).