Manis, pait ngujungka rari betaban

LEKA renung bisi mega mantai pasal pengagit kitai Iban berumba ngirup tuak.

DALAM main asal benyawa kitai Iban, renung semain tu sigi nyelai ari main bukai laban tu siti pemerindang ba
rumah panjai lebuh lemai hari, lalu ulih dipejalaika enda ibuh nganti orang bisi pengerami tauka begawai, asal meh
bisi lemambang deka berenung.

Leka renung mega digaga sereta ditempa nitih penau enggau pengelandik siku-siku lemambang. Ngambika banding, baka enggi niang Segaya anak Geraik menya ke numbas pemanah nyawa tang leka iya chukup kreatif.

Baka ba genteran tu…Melayu bejaku bekauu – kauu, Cina bebo-bo, wa bechai, orang putih bansa British bechis wis
bewai-wai.

Dalam awak ke sekali tu aku deka mai bala kitai bekunsi ninga sekeda tusi cherita dalam leka renung semain nitih karang niang YB Jimmy Donald dalam bup Renong Semain ke diambi aku empegal ba senentang indu dara ke ngeransi tegal nadai digayap lelaki lalu berunding deka nerebaika rampang bungai.

Lebuh pulai mandi datai di rumah, indu dara nya lalu nanya penemu memangku karung menimang, sekalika rampang bungai nya tau diterebai nyerumba lemai sabung petang. Indai iya lalu madah nya ukai semina tau, tang rampang bungai nya lagi deka ngambi bujang pandai awakka ngundang iya di gensarai bungai pinang.

Udah nerebaika rampang bungai, indu dara lalu deka miau pemandang. Teruna dara lempung lalu angkat ngenung ari panggau ke begenurau tuntun punggung megai selanjau ijau manuk sabung. Iya lalu miau perapat ubat jayau duyung. Udah nya lalu angkat kindang-kindang baru dara mekang, megai selanjau ijau manuk labang lalu miau perapat ubat
pemandang batu petakang bintang belulung.

Udah nya nyau lenga-lenga teruna dara nganta,megai selanjau ijau manuk lia, lalu miau pugau minyak lama batu bingka lia betung.

Tembu nya, nyau kapa-kapa baru nyawa lengayun endun dara, miau pugai minyak lunda enggau selanjau ijau manuk banda ke betada nyala bepunggang tuntung.

Iya nyau munyi Balau Lingga ke gaga ngambat Kemendan Tuan Linsung. Tekala nya lalu ngelegua pemandang jayau indu dara, ngampuhka serengak mua tudung lung; mengkurak minyak jayau belabak,ngampuhka serengak mua
puchung.

Indai iya pan sigi madah jayau nya endang tetap ngasuh sida lengayun bujang lempung kusang magang-magang di lempuang kandang beradung.

Enda puas ati enggau jalai biau, indu dara pan lalu nguwa pemandang enggau rasa tengkurung rekung.

Udah diwua, pemandang lalu ditepuk enggau resu garu bungkung sereta ditangas enggau belebas minyak segulung.

IYA ENGGAI MAKAI

Laban ke kena batak rampang bungai enggau pemandang,bujang bungah pan betati tusah di gunah kandang
dada. Iya nyau enggai makai. Asi nyau asai rau rangkai ke dipandang kerekai panas bisa. Iya nyau enggau tinduk laban mata iya asai ke empeleman abuk padi puya. Iya enggai nyadi gali laban tikai nyau asal ke digaga ari duri ridan kerapa. Iya lalu nembuka pengawa iya ke ngambi Masters ninggalka nengeri tanah Kanada; pulai terebai nikal ke menua.

Mansa Kuching, iya lalu niki opis sereta bejaku dalam program ‘Nama Berita?’.

Hari siti lebuh hari nya terunji lama padam; lebuh petang lama tepagang udah jauh malam tegayam; lebuh bala apai orang nyau lama udah badu nyeringgang mangkang bedilang endur nyalai igi mudan, orang bujang pan nyau bisi ati ka indu sida serumah ke mandi tiap pagi megai kendi besuran. Iya lalu betati deka ngayap ngagai endun endat ti nguan pansap papan ban. Iya lalu seranyat angkat betekan, bejalai begadai-gadai nuju balai dara pandai ke ngasuh ati iya ngeransi balat meraie kelebawan dalam.

Enda berasai lalu ditunjang iya lamba medang ngeruruk tampang tibang rerentam. Gama iya ke kiba, nemu depa tibang betandan. Tunjuk indu iya tetegu ka tusuk labu munyi deru guntur dederam.Patung iya pan tepantup di padung gelung lelungan.

Udah nya baru iya tepeda ka sulu ati nyau lanji-lanji malai seduni, nekan di tilam. Iya lalu nunjang genturan papan. Jari
sepiak iya ngerak, jari kanan iya nekan!
Iya lalu ngerak indu dara madah diri deka nyulu iya malai resu bunga tanam, deka ngintu iya di perambu papan ban. Indu nya lalu bekalih singit baka pitan rapit palu tetensam,gelegensai baka kenyali liai rari ka indai beruang jugam,
lalu ngasuh iya pulai ari lekai papan linsan, ngejuka iya di pegu ke ngasuh iya rebah tesugam.

Nyepi orang bujang nadai agi ngundang di simbang papan dilekai, dia indu dara lalu bisi ati deka nebah pating
ruding telai. Lalu diambi iya tampang ruding tempa,dipegai iya enggau pechunggai tunjuk jari kiba,ditepanka iya di geman dabung rasa. Ruding nya munyi ke tau ngangau ka pesinau atau sulu lama, ngasuh iya ngama nuntung datai.
Ati orang bujang nyau kusang di lempuang kandung kamai. Dalam runding iya, tinting abis dikelingi, sungai abis dipansai. Iya nyau meruai,nyau enggai makai. Iya tak belematika perinyai sulu ambai di punggai papan pantang.
Laban malam nya bintang nadai terang mandang gentilang remang jurai, indai iya enda ngasuh iya mindah ke
bukai, tang ngasuh iya belajar bebingkai nembuka simpai sundang merarang. Iya nyaut indai iya madah diri deka ngempang ngagai Nanga Batang Rajang laban deka ngulihka ikan tebalang ke mayuh bekengkang,bebuok gelegetang
alun gelumbang, bemua burak terang, bisi beujak tekang gempanang mau urai, bisi mata tau nampai, bejari tau megai,
ngembaika tikai, ngintu temuai enggau bala pengabang. Iya mega madah ikan nya enda mit enda besai lalu enda ulih
ngapa enti orang ti ngiga iya enda nurun maya sabung petang.

Datai orang bujang di rumah indu dara, iya lalu nyelangkawit niti rarit arung temetung,bedepaka lamba tiang teras kampung. Udah nya, iya lalu nyengkayau ke sadau,ngiga kupan bayan bekangau nyerumba senulau bulan kembung begantung. Lalu ditunjang orang bujang lamba medang teras kampung ke ditanchang enggau lampang gempanang, dibalut basung.

BARU BEKALIH SINGIT

Manggai di sadau, iya lalu bejalai, jari kiba tetemuka rampa tibang betampung,jari kanan tetemu ka tekaran ditudung sintung. Enda lama iga udah nya, patung iya tak terundungka padung papan pantang. Dia iya meda dara melisa tinduk ngela di pengala papan gandung. Bujang gauk lalu duduk ngimbai rusuk iya, nyengkauk punggung,jari kanan nekan di tandan, patung iya lalu nigung. Nyau kelama udah digerak, baru bekalih singit dara mit, baka pitan rapit palu begadai,
murus mua baka ke baru ngeleda nengali dunya miga meledai. Iya lalu duduk nyuntai chundung tekalung.

Udah betanya ka nama,seduai iya lalu bejaku begadai-gadai, berandau betelai-telai di pengalai papan padung. Pulau abis dikerandau,nyerungkai tabau kampung baung, sungai pan abis dipansai, nyau abis enseluai parai kenyulung.
Teruna dara pandai pan nyuntai pedalai, bujang lempung lalu chundung tekalung.

Ujung kudung jari kanan bujang ganggam ngerantam kuyu asam, lenggam teman rangki tuchung. Udah nya baru seduai iya sama gali, beadi-adi di linti papan gandung. Gali singit teruna dara mit, baka pitan rapit tekinsit mimit salah pangkung.Seduai lalu sama betapak mua di pengala papan simpung,sama mejam ka sulam mata menchenung, betigung patung melintang pukang.Lebuh orang bujang enggau dara tedani, dia seduai iya ninga indai indu dara tak
rengkung-rengkung batuk engkiung,pansut ari kibung gelung lelungan. Iya lalu nanya sapa orang ti enggau indu nya
bejaku diau di timpu alang papan. Indu dara madah diri semina bejaku enggau panggal iya ke pepar kiba kanan.
Tang indai iya madah dia tentu bisi orang laban iya bisi ninga anak iya betelai beteruan,ninga jaku puntang iya nyau
sebarang, endang baka orang ti merembam sulu dalam.

Iya lalu madah diri enggai bemenantuka orang lelaki nya laban dipelaba ka iya endang orang ti pemain judi tiap hari, siang malam; orang penyabung, abis belilungka gelung jam tangan, orang pengirup sampai ka mabuk ituk bemalam-malam; orang ke mapa ka reta, ngerampitka benda singa raja mingka semilan.

Ninga jaku orang indu munyi nya, lalu malu meh bujang nya di lempedu kandang ati. Pulai kerumah iya lalu gali malai linti papan paji.Indai iya pan nanya sapa ti nganu iya tajam ari duku mata besi. Bujang madah indai indu nya bisi bejaku udu mechat,melahka gerugu batu besegi. Laban orang bujang enda diasuh indai iya jadi enggau ambai iya, nya alai iya lalu mupuk kaki dua mansang nandang ngagai kibung indu ke nerenjung manah gaya. Seduai pan lalu setuju nganti di simpang jalai raya lalu nepan nambang entuka betaban rari ngiga perechit duit berega.


Nyau kelama ke udah rari dia seduai berupai jadi kaya,lalu mulaika diri ari Semenanjung Malaysia, ngena rengkung kapal lambung ke ditepan seduai mensara gentilung remang charai.Datai di menua, seduai lalu dipenyadi orang begulai melaki bini, lalu bulih pengaya sereta pengeraja di baruh singka miga betuntai. Nya meh pemanah tusun
leka renung ti ngasuh kitai chukup andal ati.

Oleh TELESA EMPERAN