Nakhoda Sebaginda Bujang Seduai Anak Chuik Keramat

Tusun Ke-9

DALAM Cherpan Lalau Pendiau: Nakhoda Sebaginda Bujang Seduai Anak Chuik Keramat dalam tusun ti Ke-8 ti dichelak dalam minggu dulu tu kemari, kitai udah macha cherita Raja Sedinang Indu ke nitah Sebaginda Bujang pegi ngagai menua Raja Merom ngarika iya, sama-sama enggau orang nuntut pesaka ti dikumbai pintu gerumu mas, iya nya lanting Raja Meru (apai Raja Merom), ke baru udah parai. Keterubah Sebaginda Bujang enda nyanggup, laban iya madahka diri berumban deka pulai ke Panggau Libau, mai buah raba ramaniah ti ke sera bini iya Enghelegit. Dalam minggu tu, ba tusun ti Ke-9, kitai deka macha tampung cherpan tu kujung ke agi.

Sehari udah bekau pengerami beselamat, nya baru Raja Sedinang Indu madahka utas pengawa ngagai Raja Sebaginda Bujang.

            “Pengawa kami di menua tu ti ngetan panjuk buk nya endang bisi tuju ti besai, Raja Sebaginda Bujang. Kebuah pia sebarang sapa lelaki ke kena sintak panjuk, iya nya mih ke lalu diambi ke laki indu ke beempuka panjuk ti nyintak nya. Tang sejeman-jeman tu panjuk kami ditu enda kala nyintak, nya kebuah kami ditu lalu enda teulihka lelaki. Baru nuan tu mih lelaki ti keterubah iya kena sintak panjuk kami. Nya kebuah nuan enda tau enda diambi aku ke laki laban nuan kena sintak panjuk aku.

            “Nyadi buah raba ramaniah ti digiga nuan endang bisi dikembuan kami ditu. Tang kami apin ulih magi iya enggau nuan diatu laban nuan enda tau enda dulu diasuh kami pegi ngagai menua Raja Merom, laban apai Raja Merom, iya nya Raja Meru, diatu udah nadai. Rayat di menua din diatu benung nguji ngerebut lanting Raja Meru, iya nya pintu gemuru mas, ari jari Raja Merom. Nya alai, ka semuti nuan lelaki di menua tu, ari nya aku minta nuan ngarika menua kitai tu awakka enggau orang berebutka pintu gemuru mas nya.”

            “Apuuuu, tu baru parai nyawa laki Enchelegit tu dikeduan nuan baka tu, Raja,” ku Raja Sebaginda Bujang, tusah ati tekenangka pemar pengawa ti diperintah Raja Sedinang Indu dikereja iya. “Udah ga aku tu ninggalka sida Indai Duat di menua din, datai ditu agi ga diperintah pegi ngagai menua Raja Merom, nyabung diri enggau orang belayaka pintu gemuru mas nya. Pengawa munuh ti diasuh nuan kereja aku tu, Raja. Utai ke dama pintu gemuru mas nya dih aku enda ngelala, kati ku aku nemu tak berebutka iya enggau orang. Eh, enda aku ibuh enggau, Raja. Enggai aku. Ukai enggai sengapa. Enggai beamat-amat. Enda aku berani napi Raja Merom. Manah nuan ngiga orang bukai nyilih aku.”

DIN ILA BEDAYA

            ‘Eee, anang nuan munyi nya penemu, apai,” pia ku Anak Chuik Keramat, “Kati nuan tembu tak enggai kin, ngelanggar perintah Raja. Ila nuan dikumbai orang buyan. Tak kumbai orang ditu ngemuyan nuan nya magang-magang kitai ke di Panggau Libau din ila. Kin ke mih, apai. Mesti lah bisi daya tua ngulihka pesaka nya lebuh datai din ila. Ti nuan takut, ila aku enggau nuan.”

            “Bejaku enda ngipakka penyai anak gamal!” ku perak Sebaginda Bujang. “Perut dih nyau suyung-suyung ngapa, nyau baka ke ka meretas!”

“Gamal tu amat dipeda nuan jai, apai, tang ati tu tak nadai nemu utai diketakutka munyi nuan nya,” timbal Anak Chuik Keramat. “Datai din ila bedaya.”

“Jaku ngapa! Enti aku tu ke bulih tiga jengkal ruang belakang nadai nemu daya ngerebut pesaka nya ari Raja Merom, telah agi nuan ke semina mesai tinga nya. Ya ga nganjung diri parai dibunuh Raja Merom enti tua kin.”

‘Enda parai, apai. Nadai iya tak berani munuh kitai sengapa. Raja Merom pen takut mih ditinggang adat,” saut Anak Chuik Keramat.

“Sebarang iya mih. Tang enti aku mati din, nuan pan mati mih. Nadai orang mai nuan pulai ke menua.” Suma bendar ati Raja Sebaginda Bujang nurutka perintah Raja Sedinang Indu. “Hah, dih! Semadi tak nundukka orang indu, Gat.” Raja Sebaginda Bujang nyau enda badu-badu beratika kuyu Raja Sedinang Indu ke ngenying pelu-pelu baka telu manuk ti diengkahka di mua tajau guchi.

Sereta tawas teberingkas siang pagi siti, sida lamat, berekat, jeragan enggau kelasi kapal lalu berengkah meresi sereta ngechat kapal ti endang selalu dikena Raja Sedinang Indu raun beperindang makai angin ngagai tasik luar. Tambai lama dibuka orang magang-magang, lalu diganti enggau tambai baru. Injin kapal dichik, dibiki sereta dituchi enggaika gelana di rantu ai.  Bekal ti chukup lalu dibuat ke dalam kapal. Tiga hari berentak orang nyikap kapal, baru iya chukup besedia dikena belayar ngagai menua Raja Merom.

BETAMPUNG

Oleh PINSIL SARATOK