Cherpan: Rabat

Tusun Ke-3

SIDA sebuat nyau mupuk. Nasit, enda nemu sapa sida bisi mai utai diempa – tapau. Ming nyempulang tubuh ini iya begulai enggau drebar van mayat, Ah Tong. Sida apai Ming pulai ke rumah dulu nepan kerita kaban begulai gawa enggau Ming. Udah berandau ngerampas enggau apai iya, Ming pan mai Ah Tong mupuk.

“Kitai nengah jalai atas, awakka enda nikal ngagai Mengeri Sibu,” ku Ah Tong madah ngagai Ming.

“Sebarang iya mih,” ku Ming. Aruh mih nya laban sepital tu endang udah nyau semak Durin ku ati iya.

Pejalai sida ari sepital Sibu nuju Saratok deka nengah Jematan Durin, mansa simpang Kanowit, Simpang Julau lalu rembus ba jalai ari Sarikei ke Bintanggor. Ming enda tentu berundingka menua ti ditengah enggau dipansa. Ati iya udah di Rian Mipau Umbang. Iya berundingka pekara bekaul enggau penatai tubuh ini iya di rumah.

Udah datai ba simpang Julau, mansa Kolej Pematih Pengajar Rajang, van sida ngelunju laju nengah jalai ke Sarikei. Enda berasai, sida udah rembus ba simpang nuju mengeri Sarikei. Van sida biluk ke kiba lalu niti jalai nuju Saratok. Ah Tong teleba mai van laju lalu enda lama udah nya sida udah datai ba pasar Jakar. Ah Tong mai sida ngetu kemi tauka merarau dia enda lama.

 Sida majakka pejalai sida mansa SMK Sungai Pauh enggau SRK Sungai Pauh lalu enda berasai ensepi van tak bejalai lubah. Van nyau udah betanjak ba jalai renjan niki Bukit Kayu Malam entara Sarikei enggau Roban. Pama peninggi bukit nya.

Udah nya sida mansa rampa menua ti bebukit ba Bukit Sebangkoi, pah Bukit Kayu Malam. Sida majak nengah jalai ba ulu Sebelak, mansa Berayang, Dabai sereta Simpang Mudong. Sida majak lalu mansa sebuah sekula SRK Berayang ti lalu ditangkanka menua orang di Lichok, mansa sekula SRK Lichok.

Ah Tong udah teleba bendar enggau jalai ba menua nya, datai ke iya empu pan nyau nemu nama mayuh menua siti-siti; Simpang Roban/Kabong, Sungai Engkabang, Batu Empat, Sungai Berangan, Simpang Pasar Saratok, jematan Awik udah nya majak niti jalai nuju ke Sri Aman. Udah sida meraka jematan Krian, van sida biluk ke kiba urung tangki ai tinggi di bukit. Nya simpang jalai nuju Kaki Riam lalu mansa dua buah rumah panjai. Jalai nengah menua bebukit tang nasit jalai nya udah dibelakin. Ba ujung jalai tu mih alai Rumah sida di Rian Mipau Umbang begulai enggau tiga buah rumah bukai begenturung dia.

Sepenyempat van sida datai di mua rumah sida di Rian Mipau Umbang, sida lalu mai rarung ini Ming begulai enggau tubuh iya sekali. Adat sida dia bisi ngena genselan babi nikika bangkai tang darah nya enda ibuh diirit niti ruai. Udah chukup babi disayat ba mua bilik orang ke bisi penusah,

Udah rarung diengkah ba tengah laman ba mua tanju sida Ming, siku babi pan disayat Ukik. Iya bisi besampi tang enda nyengala laban gamal iya balat tusah. Iya ke nyayat babi nya enggau sabak-sabak. Darah babi nya dilut ba rarung ti mai reti penti pemali ti tau ngachau rumah nya nadai apa nama agi.

  Jam nya mega dinga sabak orang di bilik ke begau lalu pansut ke luar nyau terangkat. Orang bekerung nyebut ini Ming. Orang bekerauh; bekesirut sereta bekesikuk. Semua bereta mansutka serebana sereta penyinu diri. Semua nya mandang penyinu sida ke ini Ming ke ninggalka dunya tu di menua orang.

Orang ke nganti udah nemu ngatur diri. Sida nadai betugung, nadai begelumu.  Sida serumah meda ari jauh taja pan bela sinu ati ka ini Ming. Enti baka selama lapa orang enda begau begelumu nyambut penatai bangkai iya.

Rarung ini Ming diatu dirinan tama ke dalam rumah lalu diengkah memanah sereta begadai-gadai ba panggau baruh di ruai ti udah dikelingi sapat ti digaga ari teranting tali lalu diredaika pua kumbu enggau pua bukai ke bisi. Pala ini Ming nya muak ke pugu tanju. Nya agi nitihka adat selama.

Betampung…

Oleh JANTAN UMBAT