Hikmah Exchange pemandang baru • Nyadi pemun sistem digital penuh ngagai bangunan moden bukai di Sarawak

BANGUNAN… Hikmah Exchange di Jalai Haji Taha, Satok diatu benung digaga sereta dipelabaka tembu ba tengah taun 2022.

SATOK sebengkah ari genturung sub-urban ke diatu jampat mansang bepalan urung iya dua kilometer (KM) ari tengah Mengeri Besai Kuching.

Tajapan Satok selalu disebut nyadi genturung kampung ba bandar, tang enggau atur pengawa landik raban ketuai perintah Satok udah dipaduka enggau kampung, palan bejual enggau mayuh bengkah aktiviti komersial ke majak mansang ke enda muai gaya pengidup Kampung Melayu.

Enti dipeda diatu Satok benung mansang enggau jampat lalu mayuh bengkah pemansang baka pengawa ngaga bangunan Hikmah Exchange di Jalan Haji Taha, Satok ti dipelabaka tembu ba tengan taun 2022, bangunan tu deka nyadi bangunan landik keterubah ba nengeri tu.

Kepala Menteri, Datuk Patinggi Tan Sri Abang Johari Tun Openg madahka, bangunan ti diempu Permodalan Satok Berhad (PSB) nya ngembuan rengka ke penuh enggau sistem nyentuh elektronik tauka e-switch.

“Enti sema tembu ila, bangunan tu deka nyadi pemun sistem digital penuh ngagai bangunan moden bukai di Sarawak sereta nya deka beserimbai enggau juluk ati kitai ti deka ngemesaika guna teknologi ba semua pengawa,” ku iya.

Bangunan dua begembar peninggi 22 tingkat nya digaga enggau ungkus lebih RM300 juta ba tanah pemesai 1.489 hektar (3.68 ekar).

Bangunan ke ba palan ti dedat ba tengah Bandar Raya Kuching nya dibagi ngagai tiga sitak iya nya opis, palan konvensyen enggau palan komersial.

Abang Johari ke ngempu penuduk Sitak Kunsil Nengeri (DUN) Satok, madahka pengawa ngaga bangunan nya nyadi ke tanda ti pemadu beguna dikena ngetanka reta tengkira ti diempu raban bansa Melayu ba bandar. “Kebuah pia ku iya, nadai mayuh agi reta tengkira raban bansa Melayu ke tinggal ketegal pemansang ke nyadi beberapa taun tu.

“Kitai enggai meda reta tengkira raban bansa Melayu lenyau sama sebaka enggau nama ke nyadi ba Kampung Wireless di Miri, Kampung Dagang di Bintulu sereta Kampung Nyabor di Sibu.

“Pengawa ngaga Hikmah Exchange nya nyadika pugu pengawa dikena ngetanka reta tengkira raban bansa Melayu bandar,” ku iya. Enti udah tembu ila, iya deka meda 100 pesen premis di bangunan nya diempu raban bansa Melayu.
“Kitai mega enggai meda iya dijual tauka diempu orang bukai ari sida ke asal ngempu iya,” ku iya.