NOVEL TERUTU JEMU AMBUN LEMAI

JANTAN UMBAT

TUSUN KE-20

PULAI MAI PENGINGAT

TUMU-TUMU pagi hari siti, sida bela udah begelumu ba ruai hotel besedia deka mulaika diri sambil becheritaka pasal sida ke matau menua ngagai Taman Bukit Sibau. Nambahka nya sida nyau richuh becheritaka pasal penerang ti diberi Pengurus hotel. Taja jaku nya pandak, sida nembiak ngasaika nya amat beguna laban nya bisi nyebut pasal peluang bekereja ba hotel lalu bekaul enggau dagang temuai.

Sida sebuat mega sampal muji penyamai ikan pansuh ke lauk sida lemai kemari lalu pia mega madahka diri rindu meda ajat indu enggau lelaki ti dibantaika sida pekereja hotel demalam.

Diatu, sida ransing deka mulaika diri mai pengingat enggau peneleba ti diulih sida ba penemuai nya. Hari pagi nya, manah. Matapanas udah geganchar manchar bilik enggau ruai hotel. Angin chelap sereta beresi kekesut datai ari tasik lalu ngasuh seput berasai nyamai. Nya ngasuh tubuh berasai regas.

“Selamat pagi. Kati baka kitai sebuat, gerai semua? Nadai apa nama udah nujah Taman Wung Sibau?”  ku Cikgu Edward, malik tuchum-tuchum ngagai bala nembiak iya.

“Selamat pagi pengajar. Gerai nyamai semua. Demalam jenak amat tinduk. Pagi tu, semina malin temuai kitai bisi enda nyamai mimit,” ku Nadia nyaut sambil malit serungak idung iya ke asai bisi berai mimit. Pangan bukai iya ketawa sambil merening Nadia ke amat tak enda tentu regas pagi nya.

“Manah mih nya, enti bala nadai apa nama. Tak bisi irau ga ati aku, enggaika bala bisi kelalu lelak. Eh, malin temuai kitai nya nadai ngawa. Lagi iya gerai, udah kitai bejalai. Anang perasa, bisi orang runggu ensing,” ku Cikgu Edward sambil nyindir Nadia.

NADIA MUJUR NYADI MALIN TEMUAI

“Ukai nama aku tak bisi renga. Tak bisi asai stress mimit laban ke nanggung pengawa nyadi malin, ngereja pengawa ke enda kala dikereja. Aku takut amat enggaika hari tak kudi. Ku sempama kitai, kemaya ninga ingkat ke laut? Ni ulih orang sengapa ke nadai kala ngereja pengawa nya diasuh,” ku saut Nadia.

“Anang munyi nya wai. Anangka hari ka kabut. Nyau perenching keba matapanas datai ke lemai. Enti sema kabut pan hari, ukai mih nya ketegal malin kitai. Kabut nya natural phenomenon. Bisi kabut. Bisi ujan. Bisi panas. Nya utai diberi Tuhan. Iya ke bendar, nuan udah nyadi  malin ke mujur. Anang berasai stress,” ku Cikgu Edward ke belabaka Nadia bisi enda tembu ati nyangka diri iya ukai malin ti manah.

“Amat munyi ku nuan nya, sir. Tuhan bisi meda nengkilaka  pemindah kitai. Iya bisi begulai sejalai enggau kitai lalu ngelindung nyerayung kitai ari sebarang penusah. Praise the Lord and thanks be to God Almighty,” ku Nadia.

“Amat munyi ku nuan Nadia. Puji Tuhan. Pagi tu, sebedau kitai mupuk, aku deka nanya ngagai Tuai Raban kita sekalika bilik semua udah dikemas. Tentuka nadai utai tinggal. Aku minta Tuai Raban ngechik sekali agi. Tentuka bilik dikunchi memagang. Udah nya bai kunchi pulai lalu serah ngagai aku. Kita bukai nganti dulu,” ku Cikgu Edward.

Jong, Maureen, Said enggau Jamilah enggau sida bukai lalu beguai-guai ngereja pengawa ke diasuh pengajar sida. Sida mesti jampat. Kesatu, awakka pengawa jampat tembu. Kedua, awakka sida lagi jampat agi meleka ninggalka hotel laban boat ke dikena sida ke ili kin endang sebarang maya sida mai mupuk.

“Okay, enti bilik udah beresi semua, utai nadai tinggal, kitai besedia deka mupuk,” ku Cikgu Edward.

Jam nya, Mdm. Tan enggau Cikgu Dayang udah pansut ari bilik seduai lalu ngulai sida ke begelumu dia.

Sida sebuat pan baka ke datai kemari, perebintun baru mai kereban diri. Pengajar Edward nyerahka kunchi sambil lalu ngambi bil hotel ba kounter. Mata pengajar bujang nya gegining ngiga kenaya Maria. Siku indu ke bisi dia, benama Catherine madahka Maria enda gawa sehari nya.

SELAMAT TINGGAL HOTEL UP COUNTRY RESORT

Pengajar Edward gamal ke bisi asa ati. Ku ati iya deka betundi enggau Maria sebedau sida mupuk. Ku ati iya, indah enda baka jaku sempama ketungkah engkechung pulai ke sarang. Iya deka mai Maria bekelala enggau iya icha enti betemu dudi hari pagila lusa ulih ga betanya awakka enda baka ke enda ngelala. Ku ati, iya bisi ati deka ngambi lumur talipaun binching indu biak nya icha ulih beSMS ila. Diatu indu nya nadai, nadai ku enggau mih. Deka nanya ngagai Catherine, malu ga asai ati Pengajar Edward.

Udah ngepai bala orang ke gawa ba hotel, sida sebuat pan beterudus baru ga nurun panti semin ba serimbing bukit alai hotel Up Country Resort nya nuju pengkalan ti alai boat ke suba udah nganti. Lebuh masuk ke dalam boat gamal sida sebuat tak bisi bebali mimit. Asai enda sebaka. Sekeda nya dipelabaka sinu ati ngenang diri ke mupuk ninggalka hotel nya. Nya kepenudi sida dia ke sekali tu. Pagila lusa, kedudi hari ila tau bisi kini sida kia agi tang orang ke enggau sida kia nyangka ukai orang ke sama. Dia dih ati tak bisi berasai sinu sereta seilu-ilu. Sida nadai tentu bejaku. Sida duduk ba alai sepemilih diri.

Lebuh sida tama ngagai ruang boat nya, sida meda bisi tiga pasang Orang Barat udah ngentam duduk. Sida nya tetap temuai ke datai ari jauh. Ari randau sida, raban sida Nadia nemu bala Orang Putih nya udah ngelawa rumah panjai asal raban bansa Iban di ulu menua Batang Ai. Tiap-tiap iku sida ke lelaki nyau kuir-kuir mai sebatang sumpit. Mata sangkuh ke belunchum ba ujung sumpit nya udah dibalut enggau keretas kering. Siku ari sida bisi mai terabai kayu ti beukir begenarau. Sida ke indu bekekibing nyandik kambut ke digaga ari kulit tekalung. Ari gamal bala temuai ke datai ari menua jauh nya, sida tetap lantang ati. Sida tetap rinduka barang tanda pengingat ti ulih sida nya.

BEPANSA ENGGAU BALA TEMUAI

Siku ari lelaki nya, ke betubuh tegap ngena baju panas nadai belengan. Ba gumpal isi ba pun berang iya nyau begenarau kelingai ‘buah terung’. Tentu nya ulih iya ari Skrang. Nadia lalu ingatka siku orang Putih ke datai ke Skrang ke minta diri dipantang orang kelingai ba kedua-dua pun bau iya ti bisi ayan ba Program National Geographic dalam tv Astro. Orang Putih nya lalu nyadi anak ambu orang di rumah orang Skrang nya lalu diberi nama ‘Umpang anak Minggat’.

Lebuh boat sida sangkai ngempit pengkalan  ba ili tekat nya, dua buah bas bisi udah rerenjung nganti. Sebuah nya bas sekula bechura kuning ke dikena sida datai kemari. Sebuah agi nya bas pelancong bechat biru enggau burak ti udah dedat laban kemayuh agi orang menua tasik. Sida nya tentu kaban tiga pasang sida ke seperau enggau bala sida Nadia tadi.

Sida Nadia sebuat belubah-lubah pansut ari ruang boat nya lalu nyingkang ngelawa bas sida sambil tuchum-tuchum lebuh betemu perening enggau bala temuai Orang Putih. Raban sida Nadia sampal nacharka perening sida ke ulu nuju rampa tasik ke besabung enggau tisi langit nyangka icha kenaya hotel ti ditinggalka sida bisi ayan. Taja pia, hotel nya nadai ulih ditampai ari jauh baka nya. Temuai Orang Putih pan bisi mega baka nya, sebedau tama ngagai bas sida.

Udah bala bela besedia, deriba lalu masukka gear bas lalu nekanka  pedal minyak ngujungka bas lalu ngelunju laju. Sida sebuat sempat nacharka perening sekali agi ngagai rampa tasik digaga mensia nya. Dada sida tak berasai sekut; asai ke bisi utai malut. Ati pan pia mega, berasai sinu enda ulih diterangka enggau leka jaku disebut mulut.

Enda lama udah nya, bas lalu dikuingka deriba masuk ngagai simpang nuju rampa genturung rumah ba serimbing bukit. Bas nya mindah belubah-lubah ngerenchah menua ke udah dibuka alai nanam sabun tauka kelapa sawit bedandang. Kini-kini malik, nadai utai bukai dipeda. Rampa menua nyau gadung memagang laban puchuk sabun ti tumbuh galak  Deriba tak jengau-jengau nganti maya diri ke datai ba tengah laman sebuah ari rumah nya. Bala pengajar enggau nembiak pan udah bekeligau merening keluar. Sida pan nganti diri ke nuntung ba rumah panjai. Lebih ari setengah sida dia nadai peneleba datai ngagai rumah panjai. Ketegal nya sida amat gagit.

Nyerumba sida sebuat pansut ari dalam bas, sida udah ninga gu rumah panjai ti ka digusung sida. Munyi tabuh enda usah dipendingka ari jauh. Lebuh sida sebuat mansang semak-sesemak, dia sida ninga munyi tawak, bebendai enggau dumbak udah rerentak betimbal-timbal. Ngena bendar munyi iya. Nya munyi tabuh orang ke maya begawai, ku ati Nadia. Cikgu Dayang lalu nawis lengan Nadia sambil betanya.

“Nadia, nama reti tabuh nya? Kati ku orang rumah panjai nyambut kitai?” pia ku iya.

“Terima kasih cikgu. Orang rumah panjai ngambat kitai enggau tabuh nya. Kitai datai lagi nepatka ruai Tuai Rumah sangka aku. Din lagi baru kitai nemu atur sida. Anang irau cikgu,” ku terang Nadia.

“Okay Nadia. Lagi nuan madah enggaika bala kitai enda nemu utai,” ku Cikgu Dayang.

“Au cikgu.”