Cherpan Lalau Pendiau: Nakhoda Sebaginda Bujang Seduai Anak Chuik Keramat

Tusun Ke-12

MINGGU tu Cherpan Lalau Pendiau: Nakhoda Sebaginda Bujang Seduai Anak Chuik Keramat tu dichelak dalam tusun ti Ke-12. Macha tampung cherpan tu ba sentang tusun ke tu nyangka tau ngasuh ati kitai pemacha tegepang mimit, ketegal Raja Sebaginda Bujang seduai Anak Chuik Keramat kena jil. Uji bacha silik ke agi pasal cherita ba sentang tusun ke tu, ngambika kitai nemu enggau lenak pasal penusah ti ditapi Raja Sebaginda Bujang enggau Anmak Chuik Keramat.

Raja Sebaginda Bujang lalu minta soldadu ngaitka sangkar Anak Chuik Keramat ngagai bau iya baru. Besetuju ga siku soldadu nitihka pinta iya nya. Seduai lalu dibai orang nama pintu tujuh betangkan alam rumah pasung. Dia mih Raja Sebaginda Bujang seduai Anak Chuik Keramat, merunguh dalam rumah tutup.

Bah, nama dih daya bala menteri, pemesai, jeragan, kelasi enggau raban bukai ditinggalka Raja Sebaginda Bujang enggau Anak Chuik Keramat. Ka-enggai pan mansal diri mega sida ngadap Raja Merom, ngenataika runding diri.

“Kami tu Raja Merom deka mulaika diri dulu ngagai menua kami Mengeri Sedinang Indu, laban deka mai rita pasal Raja Sebaginda Bujang ke udah ditutup ketegal ditekan menchuri beluku mas baginda. Kita ditu Raja anang beguai becharaka iya, tang nganti penatai kami kitu ke baru,” pia ku jaku bala Raja Sebaginda Bujang.

“Ni ku pinta kita mih,” saut Raja Merom. “Tang kita enda tau enda datai kitu ke baru dalam timpuh ke serekat tu enggaika kita ila enda nemu pengujung pendiau Sebaginda Bujang. Penyalah iya tu amat berat, menchuri beluku mas aku. enti dijual beluku mas nya berega bejuta-juta ringgit. Ngelamatu, semua orang ke ditemu salah menchuri beluku mas tu, endang diletak ukum jil magang sampai mati. Iya tu pan tentu deka ditinggang ukum ti sama pemerat enti iya amat ditemu salah. Adat kami ditu nadai niki pinang, nadai niki nibung,” nya jaku Raja Merom.

Pansut ari istana, semua anak buah Raja Sebaginda Bujang lalu nepan ke kapal. Sida terus belayar mulaika diri, beguai deka nganjung berita pasal Raja Sebaginda Bujang ke udah kena tan laban ditekan menchuri beluku mas Raja Merom.

Tujuh hari tujuh malam udah sida belayar, nya baru sida sangkai di menua diri. Sida lalu nusui berita ngagai Raja Sedinang Indu.

Ninga berita Raja Sebaginda Bujang udah kena tutup di menua Raja Merom, dia Raja Sedinang Indu lalu manggil semua menteri, pemesai, pungka laki enggau soldadu iya, mai sida berundingka daya dikena ngelepaska Raja Sebaginda Bujang ari jil. Sida bukai pen bela mega besetuju enggau penemu Raja Sedinang Indu. Raja lalu merintah pungka laki iya ngambi kepala tukang rubuh, tukang tempa enggau tukang sepuh mas ke betubuh dua belas iku. Bala tukang nya bela dibai enggau ngiring Raja Sedinang Indu ngagai menua Raja Merom. Kebuah begunaka bala tukang, ngambika bisi ke pengering Raja lebuh napi penguji di Mengeri Raja Merom.

INDU NGENYING BEBAJIK

Sengalih-ngalih hari nya bala Raja Sedinang Indu lalu bekemas awakka ulih tumu bekejang pagi siti.

Semalam-malam nya Raja Sedinang Indu enggai tentu tinduk laban ngiga runding, akal enggau daya iya ulih ngelepaska Raja Sebaginda Bujang enggau selamat ari jil. Iya lalu mutuska runding diri, deka ngena pekayan lelaki awakka gamal iya sebaka enggau gamal lelaki lebuh datai di menua Raja Merom. Iya lalu nelah nama diri-empu ‘Raja Muda’, lalu enda ngena nama iya ke bendar. Iya pen lalu nyikapka diri.

Tawas pagi siti, bala Raja Muda pen belayar mega ngena kapal ti dikena sida Raja Sebaginda Bujang ke dulu agi ari nya. Tujuh hari tujuh malam ga sida iya nasik, baru sida sangkai ba Mengeri Raja Merom alun segum gigi gumbang, segera pangka pasang. Lebuh sida udah sangkai, begau ga orang di mengeri nya. Sekeda lalu niki ke kapal laban rindu bekelala enggau bala Raja Muda, laban bala soldadu, jejaga enggau mata gelap Raja Merom rindu bungah enggau bala Raja Muda ke tak indu magang-magang, kelimpah ari Raja Muda-empu. Bala indu ke dia ga ngenying bebajik baka peredik marik merejan, memanah baka buah lelemas kerangan.

BETAMPUNG

Oleh PINSIL SARATOK