Cherpan: Ngelangkah Adat

Tusun Kedua

 BISI ga orang nyebut sekeda sida nya anang enda aja; semina enggau orang ngeruh ai. Jaku bala bemacham-macham. Bisi nya muji, bisi nya nyebut utai ti enda patut disebut; mantah sereta ngumbai sida ngereja nya, ngereja tu; nda nyamai didinga.

            Pengawa nganjung nama nya enda lama laban munyi ke digerah ba radio enggau tv, semua utai ti dikereja nya nitihka atur memagang. Sepenyempat datai di palan, sida pengari enggau orang ke ngiring nyuaka borang sereta risit sida ti udah mayar wang chengkeram nambahka dokumen pengelala sida.  Tempap jari penyukung nyau meretih; bela ngeringka semengat pengari diri. Pagi nya nadai penyarut apa-apa nyadi, nya alai pengawa orang nganjung nama nadai lama. Sebedau bala pengari pulai ninggalka palan nya, pengari ari parti merintah lalu diempang kaban pengiga berita nanyaka pengadang sida ke bediri; nama ubah sereta pemansang ti deka dipejalaika iya enti iya diberi mandat baru.

            Ujan labuh merembat inggar munyi ai ke disiuh. Ribut bepuput deras; nyau merengung bebali nyadi kabut. Munyi utai kelebih agi pintu enggau sekeda penjan ti enda ditikup nyau bekesedum. Daun kayu enggau rangkang tekebu laju. Jang mulaika diri ke bilik besai lalu terus ke bilik dapur. Baru iya ingatka maya nya maya seduai bini iya berenah makai tang tadi iya tak enda berasai duduk chechanguk di ruai. Baru maya nya iya ngasaika buah lemba iya tak geriuk; randu udah begantung. Baru maya nya iya ingatkanya endang semak maya makai lemai. Lebuh datai di bilik dapur, Jang nemu bini iya benung kiruh deka berenah makai; kisuh nyendiaka pemakai.

            “Baru ka ngangauka nuan mih aku tadi. Lama endar nuan di ruai. Nama pengawa nuan din?”

            “Nama pengawa, ukai baka ke selama. Enti selama bisi orang datai ngulu. Diatu asai ke diau di langkau umai. Nadai orang enggau berandau,” ku Jang nyaut bini iya.

BAKA BURUNG NGIGA PENEPAN

            “Makai wai. Nama utai dirunding nuan tan endar duduk kediri-diri?” ku tanya Endun sambil ngauk asi lalu ngengkahka nya ba chapak Jang. Nya endang gaya iya siru enggau laki iya. Seduai iya nyau asai ke baru begulai kelia laban anak seduai iya engka dua iku lalu baka burung udah mindah ngiga penepan kediri.

            “Mayuh utai dikingat. Mayuh utai dirunding. Ingatka sida ke bediri minta pilih maya ngantung nama minggu nyin kemari”.

            “Eh, kapa menga ngingatka nya. Maya ngundi ila kitai nyunting ku ati diri,” ku Endun.

            “Nya amat tang kitai mesti nemu bagi orang ke diundi ke ulih mai pemansang. Ukai orang ke nandang-nandang. Semadi maya deka bepilih baru bisi meda ayan,” ku Jang.

            “Eh, kapa ka kiruhka nya. Kitai ngidupka diri. Menang pan nadai mih meri kitai,” ku Endun.

            “Enggai nyadi kitai enda ibuh. Diatu menua jampat mansang. Enti kitai enda nemu utai ke nyadi, kitai tinggal. Kitai enda nemu utai ku orang. Dinga nuan Kepala Menteri nyebut perintah deka ngemeranka digital ekonomi. Perintah deka ngerembaika pemansang bungkur internet. Kitai mesti nemu ubah dunya. Kitai mesti meretika utai ti dikumbai orang ngetanka hak Sarawak nitihka MA 63. Pekara ke baka tu enda diperetika enti enda ninga penerang ari orang,” ku Jang

            “Eh, rindu ka ngemediska pala diri. Ukai tak nuan ke bediri,” ku Endun.

            Jang enda nimbal jaku enchak bini iya enggaika nyau betalat lagi. Lama agi seduai iya ke telengga enda nyuap asi. Tak rindang berandau. Udah nya, seduai iya nyau badu makai. Jang mulaika diri ngagai bilik besai lalu pansut ke ruai.

            Ruai agi puang nyelambang baka ba pun lemai tadi. Jang duduk dedugau seorang-orang, diau kediri berandau nengali. Kabut enggau ujan di luar udah reda. Enda lama udah nya, Jang pulai ke bilik deka meda berita. Dipasang iya tv.

Betampung…

Oleh JANTAN UMBAT