Cherpan Lalau Pendiau:Raja Sebaginda Bujang seduai Anak Chuik Keramat

Tusun Ke-14

DALAM Tusun Ke-13 ti dichelak dalam minggu lepas, dia alai kitai udah macha pemintar enggau akal ti dipasang Bagindan Raja Sedinang Indu dikena iya ngalahka strategi jai ti dikena Baginda Raja Merom ti mutup Raja Sebaginda Bujang seduai Anak Chuik Keramat dalam rumah-jil. Lalu ba Tampung Cherpan Lalau Pendiau: Raja Sebaginda Bujang Seduai Anak Chuik Keramat dalam Tusun Ke-14 minggu tu, kitai deka beratika akal enggau daya Baginda Raja Sedinang Indu nyundang pemuruk strategi Baginda Raja Merom.

Lebuh mansang deka ngadap Baginda Raja Merom di istana, dia Raja Muda diiring bala pungka dara, soldadu enggau menteri iya-empu. Datai di pintu istana lalu, iya lalu dibasa orang ngena tujuh kali perejin meriam. Raja Muda lalu tama ngagai balairong ke alai iya lalu betunga berandau enggau Raja Merom. Seduai bekenangka macham-macham pekara di baruh hari tu. Kelama-lama baru randau rembus ngagai batang pekara ti ngenyekutka runding seduai sama-sama.

“Aku minta nuan nusi tuju penemuai nuan ngagai mengeri aku kitu, Raja Muda. Sekalika nuan bisi utai deka dipinta tauka digiga?” pia ku tanya Raja Merom.

“Terima kasih, Raja Besai,” timbal Raja Muda. “Keterubah tu aku nguji nusui asal usul diri-empu ngagai nuan awakka nuan nemu penyauh enggau penyemak tua bekaban. Kitai tu enda tentu teingatka pangan diri lama bendar udah beserara, begulai semina maya agi mit kelia.

“Kenu ku niang apai menya, iya nya Raja Meru, kitai bisi tiga iku diri menyadi. Nuan benama Raja Merom, anak tuai ke dibai apai pindah ke tasik kitu. Aku anak bunsu ke ditinggalka iya ba Mengeri Sedinang Indu, lalu nama aku Raja Muda. Nyadi menyadi tua ke tengah benama Raja Sebaginda Bujang, ditinggalka apai ba menua lama kitai di Panggau Libau. Lalu menyadi tua nya (Sebaginda Bujang) nya mih ke diabas aku kitu.  Kenu ku berita ti bisi diterima aku, iya diatu benung ditan nuan dalam rumah tutup. Nya mih batang penemuai aku ke berampas kitu, deka berundingka iya ke kena tan sereta berundingka bagi reta tengkira kitai, nyengkaum pintu gemuru mas, ti mengkang apin dipebagika kitai tiga diri menyadi.”

“Reti utai ti ku nuan nya Raja Muda, Raja Sebaginda Bujang ke benung dikurung dalam rumah pasung nya, nya menyadi tua, pia?”

“Sigi amat, Raja Merom. Iya nya menyadi tua ke tengah, biak agi ari nuan tang tuai agi ari aku. Penemu ti dipadahka aku tu ukai penemu ke ngambu, Raja Merom. Tang penemu ke amat. Kini-kini pen nuan nyidi, sigi ga penemu tu amat,” saut Raja Muda. “Lalu aku diatu keras deka nemu penyalah ti udah dikereja Raja Sebaginda Bujang, datai ke iya kena tutup baka tu.”

“Kebuah iya kena tan laban iya ditemu mata gelap aku menchuri beluku mas aku. Beluku mas nya masih dilalaika iya, keba nyentuk ke seharitu pan nya apin temu tunga.” Raja Merom murus-murus ragum enggau sumit diri. Iya lalu nguing bejaku ngagai Menteri Dalam iya. “Enti munyi tu, alai nuan, Menteri Dalam, perintah siku pemesai soldadu kitai ngambika mansutka Raja Sebaginda Bujang ari rumah pasung. Bai iya kitu, ngadap aku diatu!”

“Perintah Raja diturut!”

Bala jejaga rumah jil lalu muka pintu bilik jil, udah selapis, selapis. Tedingaka sering kunchi pintu dibuka, Raja Sebaginda Bujang pen belabuh begetar, laban nyangka diri-empu dibai keluar lalu dibunuh. Kekasak iya baka ukui ke labuh anak. Sekelim asai ke deka bira, sekelim asai ke deka kemi.

“Tu, tentu udah putus pechara pasal aku tu, Gat,” ku iya nganu Anak Chjuik Keramat. “Tentu nya bala jejaga ngambi tua. Digayang orang mih tua tu lagi, Gat. Badu mih tua bepeda enggau sida Indai Duat,” ku Raja Sebaginda Bujang meragam enggau sabak-sabak. Nyau bisi bekenaya mua bini anak iya ke di menua lebuh betapi enggau penusah baka nya.

“Anang takut nuan, apai. Ukai nya orang ka munuh. Ka mansutka tua ari jil tu. Ngidupka tua sida nya, apai,” ku Anak Chuik Keramat, nawar penusah ati Raja Sebaginda Bujang.

“Ka ngidup babi apa! Enda ka mansutka tua tu ngambika dibunuh tu lagi!” Lalu disipak iya sangkar Anak Chuik Keramat atas geladak semin rumah pasung.

“Mega tubuh aku tu, apai, puas ensepi pengasar nuan. Iga nuan nadai penyinu ke aku tu ke ngaling nuan kia-kia baka tu,” ku Anak Chuik Keramat.

Nyau bisi berasai sinu ga ati Raja Sebaginda Bujang ninga serebana Anak Chuik Keramat nya.

Udah pintu rumah pasung ke tujuh serak dibuka magang-magang, baru jejaga bejaku ngagai Raja Sebaginda Bujang.

“Nakoda, kami ngambi nuan pansut laban Raja Besai deka betemu enggau nuan di istana, diatu.”

“Nama hal, ka munuh? Bunuh mih diatu. Idup baka tu merinsa mih,” ku Raja Sebaginda Bujang sambil ngait ke bau sangkar Anak Chuik Keramat.

“Nadai Raja madahka kebuah, Nakhoda. Bai semua rengka nuan, lalu titihka kami,” ku perintah kepala jejaga ngena serengung keras. Lengan Raja Sebaginda Bujang enda digelang baka lebuh iya ke dipasuk ke dalam jil. Datai di istana, iya lalu terus dibai jejaga ngadap Raja Merom ba balairong. Sereta tepedaka mua Raja Sedinang Indu, Raja Sebaginda Bujang lalu nyerarat nyapa, empa pengaga ati iya meda siku nya.

“Ndaiii!! Nuan nya tadi Raja Se-di-di-di…..”

“Raja Muda! Raja Muda! Ukai Raja Sedinang Indu!” ku Anak Chuik Keramat ngisik Raja Sebaginda Bujang.

“Au, nuan nya tadi, Raja Muda?” Ati Raja Sebaginda Bujang bisi rawang diberi Anak Chuik Keramat. Iya lalu ngulurka jari, nabi Raja Muda. Raja Muda enda tepantup pengauk ati, tak lalu nyengkauk iya laban udah abis ati ninga berita tudah tuai deka dibunuh Raja Merom.

“Raja Besai, ah, iya tu lah menyadi tengah tua. Nama iya Raja Sebaginda Bujang. Iya diau di menua ulu,” ku Raja Muda.

“Memang betul, Raja Merom. Aku tu mih Raja Sebaginda Bujang ari Panggau Libau. Nyadi iya tu dikumbai Raja Muda, laban iya pengkuan ke kitai tiga diri menyadi. Nuan tuai pemali nama ke kitai tiga. Apai kitai Raja Meru.” Tak tau selubang utai ti disebut Raja Sebaginda Bujang seduai Raja Muda. Seduai sama diberi Anak Chuik Keramat rawang dalam ati.

BETAMPUNG

Oleh PINSIL SARATOK