Pelin besai dikena ngenalamka Sg. Rajang

MENDINGKA PENERANG… Dato Sri Tiong King Sing mendingka penerang senentang pelin besai Sungai Rajang maya bejuraika mayuh bengkah pekara begulai enggau LSS sereta JPS di Sibu.

SIBU: Pelin besai dikena numbaka sereta ngenalamka Sungai Rajang enggau Igan beguna amat dikena mutarka penanggul ampuh ba kandang Dudong ngambika efektif.

Kaban Kunsil Nengeri (ADUN) Dudong Dato Sri Tiong King Sing madahka, sida iya patut nentuka nama kebuah ke baka nya nyadi dikena mutarka penanggul ke bisi diasaika rayat lebuh nyendiaka chara dikena nyekat ampuh.

“Aku meseti madah ditu pengawa ngemanahka parit semina mutarka sekeda ari semua penanggul ampuh. Dikena mutarka penanggul ampuh ba sereta Sibu, kitai meseti ngenalamka Sungai Rajang enggau Igan enggau naka penyampat,” ku iya lebuh meri penerang ngagai media.

Tiong sebedau tu minta Opis Parit enggau Entali Ai (JPS) Sibu nyengkaum Lembaga Sungai Sarawak (LSS) meratika isu ai ke nyau majak niki ba kandang Dudong, nyengkaum ba Stabau, Sentosa enggau Jalan Salim.

“Taja pia, enti nitihka ripot opis ke besangkut paut, semua ‘excavator’ ke dikena ba maya ke diatu nya ungkup projek numbak parit enggau entail ai nya model mit.

“Ba penemu aku, ‘excavator’ nya enda ulih dikena ngemesai enggau ngenalamka sungai, iya semina dikena meresi uras ke ngasuh sungai alit.

“Kitai mega enda ulih ngemesaika sungai enti enda ulih ngenalamka iya. Beguna amat kita meseti numbak sereta nengapka parit tanah luchak ngena konkrit,” ku iya.

Ku Kaban Parlimen Bintulu nya, pengawa ke baka nya patut dijampatka dikena mantu sida ke diau ba Sentosa, Salim, Durin enggau kandang bukai laban tebal agi sida nya kurang penatai pemisi.

“Fokus meseti diberi ngagai pengawa ngemanahka agi parit mit nyadi parit konkrit ke lebih besai dikena napi maya pemayuh ai ke nyau ngenyit betambah.

“Iya beguna amat dikena ngelindung mensia mayuh ari penuasah ampuh ngenyit ke selalu amat nyadi ke meri penanggul ari sukut wang enggau pengerai ngagai ruang bilik kurang penatai pemisi enggau ekonomi,” ku iya.

Ku Tiong, Opis Tanah enggau Survei (JTS) sereta JPS patut ngenuluka pengawa nyukat sungai laban semua kandang ke patut diperatika baru berengkah ari Kapit ngagai Tanjong Manis.

“Nya urung 555 kilometer, sereta ngelawa Igan urung 145 km. Ngena teknologi enggau perengka bukai nadai penanggul. Tim merati semina mai mesin nyukat, software, generator enggau kapal.

“JPS enggau JTS ngembuan penau ngereja pengawa ke baka nya, enda ibuh ngena penemu ari luar dikena nyimatka belanja dikena ngemanahka pekara bukai ke lebih beguna,” ku iya.

Tiong mega nangkan pemesai ke besangkut paut ngambika ngenuluka pengawa nyekat ampuh ba kandang nya sereta nentuka kandang ke patut diperatika enggau naka penyampat.

“Sida iya meseti nyendiaka enggau jampat dikena mutaraka penanggul ba endur nya dikena nyeliahka penusah enggau pengerugi.

“Kitai meseti ngena strategi ngemetul ba timpuh panjai nyengkaum perambu dikena nyendika diri ba timpuh antara 15 ngagai 20 ke deka datai,” ku iya.