Cherpan: Ngelangkah Adat

TUSUN KE-5

NITIHKA pengingat, sida nemu nadai kala temuai tauka pengabang diambat ngena gendang pampat. Dalam ati sida palu enggau munyi gendang nya ngabih tebah hadrah raban sida Melayu lebuh nyambut penatai temuai ti dipebasa. Ku sida, tu pemansang adat raban bansa Iban ke dibai segang pemansang. Sida nadai terunding nanya ngagai orang tuai. Sida nemu tu chara Iban rebak baru, Iban moden, nyambut temuai tauka orang ke benama ngagai siti-siti pengerami.

            Utai ti enda disadang lalu enda ditemu bala komiti pengatur nya, sida nyangka enda ingat, nya alai sida nadai nyendiaka apa-apa rengka piring; tak nadai selemut rengka ti diguna ke piring. Sida iya nyangka ilap enda ingatka gendang pampat ti ba ripih pengawa asal raban bansa Iban nya dikena ngangauka Petara awakka datai ngabang ngagai gawai. Nya alai nitihka pengarap raban bansa Iban, enti Petara datai lalu nemu nadai piring dinahka ngagai sida, penusah tau nyadi ketegal pengeringat sida. Utai ti nyadi nya tau kemaya nya tauka iya nyadi dudi ari nya. Nya mih kebuah lebuh orang begendang pampat orang bejimat bendar; enda tau enda nyendiaka rengka piring.

            Maya pengerami nya, bala bela lantang; makai sambil beperindang. Kaban kelab lantang lalu bala Komiti Besai nyau berasai kembai mua, kelebih agi udah ninga jaku puji YB ke bisi datai. Atur nyambut amat mujur; sida ke betabuh ke bengepan asal; bebaju burung belelanjang bulu tajai, bulu ruai enggau langgai tajai enggau kenyalang ngaku bendar gamal; nyau bekekilai maya nebah ketebung. Rentak tebah ketebung amat ngena. Bisi siku dua orang ke bisi beselingka reti gendang pampat tak nyau tumbuh bulu ditambahka bulu pegu ke nyeregu. Sida ke rami nya maya malam. Enti iya maya siang, lebuh gendang pampat ngemetul nya ditebah, ujan nyala tetap gemisai sereta bekeberai labuh. Simpul ngena jaku pandak, semua atur ngemuaska ati memagang. Pemakai pan chukup lalu bala bela kenyang. Pengingat pasal pengerami nya tetap nyadi kenang manis seumur idup.

            Dalam kandang dua tiga bulan udah pengerami nya, bisi pekara ti enda disadang nyadi ke ngasuh ati alit. Lebuh bala ngenang, bisi ga ngaitka nya enggau pengerami tu lalu bisi mega ngumbai utai nya senutuk tauka coincidence. Endang tak enda arap orang ka utai ti nyadi.

Bala kaban Komiti Besai bisi dituntung penusah. Anak dara  Chairman sida  bisi ditemu sakit lalu enda gerai diperubatka ngujungka iya ninggalka dunya.  Enda lama udah nya, bini Sekretari sida mega sakit lalu enda tebantai ngujungka iya nadai mega. Dudi ari nya, siku  kaban komiti mega sakit lalu jung bebadi nyawa. Nyelai amat. Enti senutuk pan ngasuh ati alit laban  bisi sempama Iban, hari burung terebai, hari rangkang patah; hari kijang nyungkah, hari kayu rebah.

            Sekalika kaban komiti sedar tauka enda, utai ti nyadi tu nyelai lalu tau nyadi pelajar ke orang dudi hari. Lebuh orang bekenang sereta ngingatka utai ti udah nyadi, mayuh orang nyangka penusah ti nuntung nya laban sida enda siru ngereja pengawa lama lalu enda betatika utai ti patut dikereja. Taja pan nadai bukti pemati nya nyadi ketegal gendang pampat, nadai siku orang nemu tang mayuh ti sangkaka nya endang laban pengawa ti ngelangkah adat. Naka penyinu ati lebuh ngenang penusah ti nyelai tu.

            Berebak enggau maya nya dinga tak engkeraruh munyi utai di ujung tanju. Tentu nya tin puang kena kebuka kabut. Jang gelensai angkat lalu nyenguk ke luar. Iya tekenyit meda siku kaban iya datai.

“Apu laun bendar nuan datai Dum? Lama aku udah nganti. Kumbai aku enda jadi datai nuan,”

“Eh, ni tau enda datai. Udah bedanji. Ni tau bulaka semaya.”

“Nama kebuah nuan laun? Aram tama.”

            “Eh, agi nganti bup Manifesto ke disemayaka YB. Sida iya laun badu baum,” ku Dum. Seduai lalu beembing-embing tama ke bilik.

 “Oh, udah disadung pia?”

            “Udah. Tu siti ke nuan, di beri YB”

            Seduai iya lalu lama enda bemunyi sambil ke ngebak-ngebakka lambar bup manifesto parti memerintah nya.