JPBN besedia napi penusah ampuh

AUM MEDIA… Datuk Amar Douglas Uggah Embas maya aum media senentang JPBN Sarawak nyediaka diri napi ampuh kena Hari Satu ke udah.

KUCHING: Komiti Pengatur Penusah Ngenyit Nengeri (JPBN) Sarawak udah besedia deka napi penusah ampuh laban ujan ke bangat amat ketegal Monsun Timur Laut ba maya ke diatu.

Sapit Kepala Menteri I Datuk Amar Douglas Uggah Embas madahka, maya ke sekali tu empat bengkah ijinsi deka nyereta ke bisi 6,705 iku bala pemesai enggau raban lalu ari sukut lojistik bisi 286 bot, 115 lori, 247 kerita 4WD, tiga helicopter enggau kerita amfibia.

“Kami mega deka nyendiaka 625 Palan Endur Ngenduah (PPS) ke bisi kapasiti 185,000 iku mansa lalu penyampau PPS mega deka diatambahka enti patut,” ku iya maya aum media kena Hari Satu ke udah.

Ku iya, laban perintah ke sigi bertanggungjawap, Gabungan Parti Sarawak (GPS) enggau perintah besai sigi endang udah besedai deka napi sebarang penusah ngenyit berengkah ari bulan November taun ke udah.

“Diatu kami deka ngingatka baru semua residen enggau ijinsi ke besangkut paut.

“Injin penusah ngenyit nengeri nya JPBNS ba tikas nengeri, bagi menua sereta pelilih menua diatu diasuh besedia nitihka peneleba nyendiaka diri napi sebarang penusah ke tau nyadi,” ku iya.

Ku Uggah, dikena nentu semuai utai diguna mansa ba PPS chukup, JPBNS udah nyendiaka siti depo besai ba Kota Samarahan dikena nyimpan barang beguna dikena mansa baka tilam enggau iya ke bukai.

“Kami mega udah nyendiaka tiga depo mini ke bisi ba Kuching, Samarahan enggau Miri,” ku iya.

Uggah mega nangkan sida ke diau ba kandang baruh sereta selalu ampuh ngambika seruran bejaga sereta nitihka gerah pindah ngagai PPS enti nyema diasuh baka nya.

“Anang nganti ai nyau deka ngampuhka perabung baru deka pindah … nya udah kritikal,” ku iya.

Iya mega nangkan mensia mayuh ke diau ba endur ke seruran ampuh nyimpan semua dokumen beguna enggau barang berega ba endur ke selamat.

“Kami ke bekerejsama enggau Opis Meteorologi nyengkaum Opis Parit enggau Entali Ai (JPS) deka meratika gaya nyengkaum gaya hari ngambika sida ke ba kandang selalu ampuh seruran bejaga.

“Asil ripot ari semua opis enggau ijinsi ke besangkut paut mega ngayanka sida udah besedia napi ampup enggau sebarang penusah bukai ke deka nyadi,” ku iya.

Iya mega madahka, ngagai kandang tauka genturung pendiau ke jauh maya ampuh, tim sedia napi penusah komuniti ditumbuhka ngambika merati sereta nyaga gaya ba endur nya lebuh ke agi nganti ijinsi tauka opis betanggungjawap datai.