APMM mujur nyekat pengawa nyual dadah

AUM MEDIA… Direktor Maritim Pahang Laksamana Pertama Maritim Amran Daud (tengah) enggau bala pemesai iya mantaika sekeda ari dadah ke dirampas maya aum media ba Indu Opis APMM Pahang kena Hari Dua ke udah.

KUANTAN: Ijinsi Neritka Kuasa Maritim Malaysia (APMM) ngetan lapan iku lelaki ke dipelabaka bisi bekaul enggau pengawa nyual dadah ngena sungai enggau tasik ba Pelilih Rompin urung 130 kilometer ari tu kena Hari Enam ke udah.

Direktor APMM Pahang Laksamana Pertama Maritim Amran Daud madahka, empat ari semua suspek ke beumur antara 25 ngagai 49 taun nya ditan maya sida nepan bot fiber maya ba tebing tasik Muara Endau.  

“Bot fiber ke nadai lumur rejista nya dipelabaka nguji deka ngelarika diri maya bot APMM, Bot Kilat nguji ngemekka diri tang mujur digagai raban kami.

“Utai ke bisi ditemu dalam bot nya dadah dibungkus dalam dua plastik chelum dipelabaka bansa syabu 238.5 gram pemerat enggau mata duit RM3,350,” ku iya maya aum media ba Indu Opis APMM kena Hari Dua ke udah.

Ku Amran, pengudah nya sida iya mega bisi tetemuka dadah bansa syabu enggau heroin dipelabakka 388.85 gram pemerat ba sebuah rumah di Endau, Mersing, Johor ke alai empat iku agi suspek mujur ditangkap.

Sama bela dirampas mega mata duit RM600 sereta semua penyampau dadah dipelabaka berega RM61,000 ke ngasuh semua penyampau dirampas nyengkaum bot fire urung RM87,000.

“Kami pechaya sida nya diau ba Johor sereta ngena tasik mai dadah chara belalai ngagai Pahang ke dijual ngagai orang makai dadah ba Rompin.

“Tu iya keterubah kes nangkap suspek ngaga penyalah bekaul enggau dadah ba Pahang.  Kami deka nambahka lebih mayuh agi pengawa nginau dikena nentuka pejalai nengah tasik enda dikena chara salah ari aspek undang-undang,” ku iya.

Ku Amran, suspek diatu direman pengelama tujuh hari dikena mantu pengawa nasat nitihka  Seksyen 39B Akta Dadah Berbahaya 1952 ke tau ngasuh diukum mati mandatori enti ditemu salah.