Kuasa Mistik Bansa Dayak

BA Tusun Ke-8,  aku udah mai kita nampung pansik  pasal penemu Sihir (Black Magic, Ilmu Hitam). Nya semina sekeda ari chunto di serata dunya aja. Ngena simpul penemu ti pandak, semua menua, semua pupu raban di dunya tu endang bisi ngembuan raban SIHIR kediri empu magang taja enda sebaka pemisa tauka penguat. Semina mensia ti megai agama Monotiesme tauka  agama Petara (God Almighty, Tuhan, Allah Taala) aja ti  nadai ngembuan penemu ti jai (black magic) baka nya agi.

Taja pia, sekeda  sida tu agi begunaka penemu jai nya: lalu limpang ari ajar Petara ti bendar. Kira ke enda alah sebut, enda alah itung raban mensia ti agi nguna penemu SIHIR di dunya tu. Tuju aku mansik sereta nyebut  penemu SIHIR ba daya idup bansa-bansa bukai di dunya tu, awakka bisi kena kitai manding sereta mida penemu nya dalam pengidup bansa bukai enggau bansa Dayak: iya nya bansa kitai Iban empu.

Sekali tu aku mai kita meda lalu mansik penemu SIHIR nya dalam jalai pengidup Bansa Dayak.          

          Kenu ku sekeda penulis bansa bukai, pupu raban bansa Dayak nya duduk ba  Lumur lima  antara bansa-bansa  di dunya tu ti  dikenakutka orang ari menua bukai.  Bisi mega penulis sejarah orang Barat madah, “The Dayak, Iban  fear no other tribes. [Dayak, Iban enda takutka bansa bukai.]”   Nama kebuah?  Uji kenang tauka bacha pasal penyarut antara bansa Dayak enggau bansa Madura di Kalimantan bulan Februari 2001.  Kelimpah ari nya bisi mega rita di Kalimantan, Indonesia pasal  bansa Dayak nya  sekeda ari seraban  bansa ti pemadu ti  tebilang dikenakutka mensia di dunya tu.

Bisi lima pekara ti ngasuh bansa Dayak  tebilang dikenakutka orang di dunya tu iya nya baka tu:


1. The  Ghost Warrior

Bansa Dayak bisi ngembuan ‘The Ghost Warrior’ [Bujang Berani Antu @ Sedadu Antu]. Amat tauka enda? Pechaya tauka enda? Di Kalimantan, Indonesia menya ‘The Ghost Warrior’ nya disebut orang  Penglima Burung. Gamal Panglima Burung  agi  nyadi tanda tanya ba ati mensia mayuh  tauka  disebut orang misteri. Nyelai. Iya deka  nyerang sapa-sapa ti  orang, mensia tauka Antu ti bejai sereta ngelanyaika bansa Dayak ti ngetanka tanah Borneo.

2.  Humans With Full Tattoo
Mensia ti bepantang nyadi pekara kedua, kebuah bansa bukai takutka bansa Dayak di Borneo. Bansa bukai di dunya tu jarang meda pantang @  tatoo bansa Dayak  ti nyau serat tubuh dibalut pantang. Ukir pantang ba tubuh bansa Dayak ngembuan reti ti mistik: ukai sengapa baka pantang nembiak diatu.

3. The Deadly Sword 
Duku ilang & Mandau  nya mih ti disebut sida ‘Sword’. Duku bansa Dayak nadai pedang. Enti sema sida bisi ngembuan pedang nya engka dibeli tauka dirampas ari munsuh sida ti alah bebunuh  maya jeman British tauka Belanda kelia.  Kenu ku sida duku dua bansa tu ngembuan mistik tauka penyelai kediri empu. Utai baka tu disebut bansa Iban beratu. Bisi mega cherita ti madah duku dua bansa tu ulih terebai ngiga dengah tauka munsuh. Kenu ku sekeda penulis Orang Putih  duku tu ulih munuh sapa-sapa  aja enggau nadai  pengasih. Tang pekara ti bendar iya nya bansa Dayak, Iban enda munuh mensia sengapa enti orang nya ukai munsuh sida. Pia mega, bansa Dayak, Iban enda tau mungkar tauka ngaga uti bunuh dulu, enti mensia nya enda ngachau sida. Tang ti sida diutai tauka dikachau lalu kena bunuh dulu, bansa Dayak, Iban deka beambu munsuh enggau orang nya. Ambi ke chunto: bansa Beketan, Seru, Lugat, Lusum, etb bemunsuh enggau Dayak, Iban di Borneo laban raban bansa nya ti dulu ngachau lalu munuh bini anak bansa Iban sebelah langkau umai dulu kelia.    

4. Poisonous Chopsticks
Sumpit ti ngembuan laja ti bisi ipuh nya mih  disebut sida ‘poisonous chopstick’ nya.  Dulu kelia  sumpit ti bisi laja ipuh nya semina dikena bansa Dayak, Iban  ngulihka jelu jangkit ba puchuk kayu. Kelimpah ari nya sumpit mega nyadi senyata maya ngayau tang jarang dikena laban iya ribat dibai sebelah babas.  Munsuh bansa Dayak endang takut amai ke senyata Dayak tu laban iya ulih munuh  ngena chara sengian: ngipa munsuh ngena chara belalai.

5. Dangerous Magic
Utai ti disebut Orang Putih ‘Dangerous Magic’ nya engka  nya pengaruh ku kitai Iban.  Pekara  kelima tu amat mayuh nganakutka bansa bukai. Kenu ku sida  bansa Dayak ngembuan ubat pengaruh ti bisa. Utai tu mih disebut SIHIR dalam jaku Melayu tauka ilmu hitam.

Kelimpah ari lima pekara nya, utai ti ngasuh bansa bukai takutka bansa Dayak iya nya: Dayak, Iban mega bisi ngembuan Sembilan bansa “Black Magic, Ilmu Hitam’ tauka disebut orang mistik. Pekara tu mega sebengkah ari raban SIHIR ti bisi dikembuan bansa bukai di dunya tu. Utai tu mega sebengkah ari senyata Bansa Dayak kena sida nyaga diri empu. Bansa Iban nyebut 9 ‘Black Magic’ ngena jaku sampi tauka puchau.

Tumbuk Sembilan pintu: puchau tauka isin tu ulih ngasuh tubuh munsuh sida tembus. Puchau tu selalu diuji sida ti ngembuan puchau tumbuk tu ba pun pisang tauka pun kayu. Jari orang ti masang puchau tu ulih tama pun kayu tauka pun pisang. 

Puchau Berat Tanah: Ngasuh tulang musuh enda tan bediri atas tanah lalu ngujungka semua tulang dalam tubuh munsuh nya patah lalu mati.

Panah Terung: Munsuh orang ti masang puchau tu deka bebali bechura choklat tauka chelum nemaram lalu mati  tiga hari udah nya.

Panah Lombok: Sebengkah ari pengaruh tauka puchau bansa Dayak ngasuh tubuh munsuh sida berasai pedas lalu bebali mirah. Musuh mega deka ngasaika diri aus tang ai ti diirup mega berasai pedas. Udah nya, tubuh musuh deka lem-selemi lalu parai  tiga hari udah nya

Buluh Pengerindu: Penemu mistik tu semina nyadi jayau kena orang ngulihka indu tauka lelaki ti dikerinduka sida.   

Minyak Bintang: Penemu tu suah dikena Beliau, Bomoh, Dukun nyumanka tulang mensia ti patah. Tulang ti patah deka bejantil maya seminggu udah diunsut minyak nya. Sekeda sida Beliau tauka Bomoh  nyebut tu ‘White magic, ilmu putih’.

Taring Babi: Pengaruh tu selalu ulih sida ti mujur munsuh  babi kampung ti berantu: kenu ku sedeka orang, babi nya ngembuan ‘jin babi’. Taring babi tu tauka kebal. Sida ti ngembuan pengaruh tu enda ulih pantap munsuh.

Duku Sitan: Selalu disebut kitai Iban nyabur berantu. Kenu ku orang tuai, duku tu ulih terebai kediri empu lalu mumpung pala munsuh. Tang, iya enda mumpung mensia sengapa ti ukai munsuh.Di Kalimantan, Indonesia pengaruh tu disebut sida ‘Balsem Hitam’.

Di sekeda menua Iban nyebut pengaruh tu dikumbai orang PENGUNGKAM. Pengaruh tu semina dipesi ba uta ti selalu dikena munsuh. Enti kena pegai tauka kena tubuh, munsuh asai ke pedis dada lalu mati empat hari udah nya.       

Nya mih lansa pasal dunya misteri ti bisi kaul raban Bansa Dayak, Iban. Nya mih munyi dunya misteri @ ‘alam ghaib’.

Kati nama bida dunya misteri bansa Dayak, Iban enggau bansa bukai di dunya tu?  Munyi aku dulu suba, sekali agi ku madah, tuju aku mai kita macha tauka mansik pasal dunya misteri tauka disebut kitai Iban ANTU,  ukai aku deka mai kita nyembah ANTU tauka ANTU BUNSU PETARA tang tetap nyembah Petara (God Almighty) taja kitai ngena chara ti bebida.