Polis nyidi suspek nyerungkai rumah

SIBU Superintendan Collin Babat.

SIBU: Mensia mayuh ke bisi penerang senentang seiku orang ke udah diketup uduk bansa German Sherpherd diasuh madah ngagai polis.

Sapit Kepala Polis Pelilih Sibu Superintendan Collin Babat madahka, seiku orang nya dipelabaka bisi bekaul enggau pengawa kes nyerungkai rumah kedai nyual kerita udah dikena ba Jalan Persiaran Brooke kena Hari Tiga ke udah.

Ku iya, sida iya bisi nerima ripot ari seiku orang ke ngaga kompelin beumur 28 taun, iya nya seiku salesman kerita udah dikena.

“Lebuh orang ke ngaga kompelin nya datai ba endur gawa urung pukul 8.00 pagi, iya bisi tepedaka bekau darah ke mayuh amat ba geladak ruang mua kedai.

“Orang ke ngaga kompelin nya madah ngagai pengaji iya sebedau ngaga ripot polis senentang pekara ke udah nyadi,” ku iya lebuh meri penerang kena Hari Tiga ke udah.

Ku Collin, ari asil pengawa mansik sida iya bisi meda dua iku uduk bansa German Shepherd ke nadai ditanchang dilepaska ba kandang kedai nya maya ditutup.

“Lebuh meresa kami bisi tepedaka bekau darah ba ruang opis sereta bisi pintu pechah ba bilik besai ke ngayanka bisi penyarut ba endur nya.

“Ketegal nya kami meresa semua hospital enggau klinik perintrah sereta swasta dikena ngulihka penerang senentang seiku orang ke diketup uduk,” ku iya.