Lagu Iban ti ulih narit ati bansa bukai

Penatai penanyi baru tau dikumbai kitai siti pemansang ba industri muzik Iban. Artis tauka penanyi baru datai enggau nadai sekat laban sapa ke bisi pengeran enggau duit ulih ngaga lagu enggau album kediri. Taja pan pia, pemayuh tubuh bedau tentu nunjukka kualiti lagu industri muzik Iban. Orang nyangka enda temegahka kitai enti kitai semina mayuh tubuh tang lagu Iban lalu enda berubah manah ari segi semua sukut kualiti.

ARTIS MINGGU TU

Minggu tu kitai bekunsika berita enggau cherita ari siku artis ke udah bisi semilan iti single. Austin Mathew terubah aktif ba dunya pemerindang kenyau ari taun 2011 suba. Madahka penatai diri ari Sibu, Austin peranak Iban – Kenyah diatu gawa di Kuching sambil aktif ba pengawa belagu.

Iya terubah mantaika diri ba dunya pemerindang belagu begulai enggau bala bakih iya ba siti band. Austin terus aktif datai ke iya nyadi penanyi solo berengkah ari taun 2013 nyentuk ke diatu.

Lagu ti keterubah dirikot Austin Mathew nya Februari. Lagu nya ku iya digaga iya empu tang muzik iya digaga Daniel Ading.

“Tu mih lagu ti keterubah sereta terus mai aku lekat ba dunya pemerindang. Taja pan lagu tu ukai lagu ti  popular tauka ‘hits song’ tang aku berasai puas laban ari lagu tu mih aku dikelala orang ba industri pemerindang,” ku Austin ngepunka saut iya ba randau kami duai.

SEMILAN ITI SINGLE

Ari taun 2013 ngagai taun 2019, Austin Mathew udah mujur ngeluarka semilan iti single. Single ke pemadu baru nya Lelengau.

“Pengudah single Februari, aku kala ngeluarka single Ensera Ba Dada enggau Rubina. Ensera Ba Dada tau dikira mai tuah ngagai aku laban lagu nya udah mujur enggau masuk ba finalis Cats Exsposed Award Vol. 1 2019. Taja aku enda menang ba pekit nya tang iya udah mai aku dikelala lebih mayuh peminat lagu Iban, ku Austin sekali agi bekunsika cherita diri.

ALBUM PENUH

Ditanya nama kebuah iya lalu enda ngeluarka album penuh, Austin madahka pekara nya sigi udah lama bisi ba runding iya.

“Ngeluarka album penuh ukai pengawa ti mudah. Kelimpah ari penanggul ba belanja,  lagu ti manah sereta engkeman ba diri enggau bala peninga nya utai ti chukup beguna tauka siti chabar. Ba siti album penuh enti ulih mesti bisi lagu popular tauka “killer song”. Lagu nya mih ke ulih ngelakuka album enggau nama penanyi nya. Tang enti semua lagu ba album nya enda tetaritka ati peminat, iya tau ngasuh kitai rugi besai,” ku Austin nyaut nama kebuah iya lalu bedau ngeluarka album penuh baka sekeda penanyi baru.

Ngenang lagu Rubina nya Austin madahka lagu nya digaga Hairee Francis. Muzik lagu nya mega digaga Hairee Francis ba Francis Five Studio.

AKTIVITI BEPERINDANG

Diatu kitai Iban udah tetemuka runding ngiga jalai untung ari pengawa belagu enggau dagang. Pengawa beperindang nya siti chara ke ulih narit mensia mayuh datai ngagai premis dagang pemakai enggau utai irup.

Raban artis enggau orang ti ngempu dagang ngaga palan sida nyadi palan endur beperindang. Trend pengidup mensia diatu enda baka ke dulu suba. Mensia kemaya hari tu udah nemu reti beperindang sambil sida nyamu diri. Tu siti ari trend gaya pengidup endur kitai Iban ngelantangka ati diri.

Enda ngira artis lama tauka artis baru, palan / premis dagang baka cafe, bar, lounge tauka rumah asap (smokehouse) mayuh meri peluang ngagai bala penanyi enggau pemuzik merindang mensia mayuh sereta mantaika pengelandik diri.

PENGARAP BA LAGU ENGGAU MUZIK IBAN

Enggau penatai teknologi baru kelebih media sosial, lagu enggau muzik Iban patut dikerembai ngagai lebih mayuh orang nyengkaum bansa bukai.

“Enti ulih kitai patut nengkebang mayuh agi lagu ti ulih narit ati bansa bukai. Reti nya ngaga lagu ti engkeman enggau sera sida. Ba aku, melodi enggau leka lagu ti badas nyadi pekara ti tau narit ati peninga. Nambahka nya, cherita dalam lagu mega patut cherita ti diterima mayuh. Uji kitai bechuntoka lagu ti popular diatu. Ari nya kitai ulih meragam ba ati diri utai ti badas enggau iya ti enda badas,” ku Austin.

PRINSIP IDUP

Pemujur ba pengawa nyadi pemerindang mega begunaka disiplin enggau prinsip idup ti badas. Nadai utai ulih nyadi mujur enggau badas enti kitai empu nadai atur enggau chara ti badas.

Lebuh ditanya nama prinsip idup iya, Austin Mathew diatu ke agi idup bujang madahka iya lebih senang nyadi orang ti ngemaruhka diri, rajin sereta nelap  (Stay humble, work hard and be kind).

PENGIDUP ARTIS

Bekenangka gaya pengidup artis tauka pemerindang, Austin arapka industri muzik di Sarawak ulih betambah nyamai endur ngiga jereki. Enti ulih ku iya, artis lama enggau artis baru enda patut bebagi ati.

“Aku arap semua artis lagu Iban sama besukung pangan diri. Bai mih ati ti badas sereta bepengasih. Ngena chara nya kitai ulih ngiga jalai ngemujurka lagu enggau muzik kitai,” ku Austin.

Ditanya sentang pekara idup bujang, Austin Mathew ti tau dikumbai bujang imun sereta enda ngeninggi diri, madahka diri enggau mejal diri ba pengawa ngiga sulu ati. Kebuah pia ku iya laban pekara “jodoh” nya bepanggai ba jari Tuhan; kitai semina merambu.

Kitai arapka Austin terus mai ati sabar laban pengidup bujang mega enda salah. Utai ke pemadu badas nya kitai terus besabar laban orang ti sabar deka bulih penguntung.

Ditanya ni gaya indu ti narit ati iya, Austin Mathew madahka diri deka milih  iya ke patut  laban tiap-tiap iku indu bisi gaya kediri ti narit ati lelaki. Iya tetarit enggau indu ti nemu meragam ati iya, bebasa sereta landik ngambi ati. Taja pia, Austin enda ga nyemetak madahka diri udah tetarit ati enggau indu pengajar.

PENGARAP

“Terima kasih ke semua kita ti nyukung aku ari ngelama tu ti udah. Terima kasih semua DJ radio, raban pemberita, kaban facebook, komposer, pemuzik, palan pemerindang enggau semua ti enda ulih sebut aku ditu magang,” ku Austin Mathew ngujungka randau kami duai.