Dayak, Iban Borneo

Tusun Ke-26

NGENANG pasal Dayak ‘Ibanic Group’ ti keterubah datai di menua Sarawak iya nya endang Dayak Iban (Remun). Sebedau nya, menua pesisir, ulu sungai, kampung jerung endang agi diuan, mayuh macham bansa jelu, antu, kelimpah ari bansa Baketan, Seru, Beliun, Lusum, Lugat enggau ti bukai. Tuai bansa Iban Remun benama Numpi mih pun telesak sekeda ari bansa Dayak (Bidayuh), Iban Sebuyau, Iban Skrang, Saribas, enggau bukai. Taja pia, sebedau nya Dayak ti bejaku ngena jaku Iban tu, apin disebut nama Iban.

Peturun Tindin

Peturun Tindin “Pimpin Bragah Ngindang” ngadaka mayuh Tuai Iban menua Saribas.  

Udah parai Demong, bala anak telesak iya pan pindah baru ngagai Nanga Letong enda lama. Udah nya sida nikal baru lalu berumah ba menua antara Sungai Anyut enggau Sungai Paku.  Anak ketiga Demong ti benama Bundak enggau nembiak iya bedau diau di Ulu Samu. Udah parai Bundak, menantu iya Jungan nganti iya nyadi tuai ngiring nembiak sereta kaban belayan sida.

Lebuh Kelanang, Kelimbang, Bundak enggau Bakak nyadi tuai bansa Dayak Iban megai menua Paku, bansa Baketan Temuda endang udah berimba ari Ulu Samu lalu ke ili naka Lubok Baang. Baketan Kampung ke begulai enggau Entigu di Ulu Paku enda bumai. Sida idup makai dagin jelu ti ulih sida ngasu beburu sebelah kampung puang.

Penatai Asal Dayak Iban

Bala Dayak Iban endang ari kenyau ti agi diau di Batang Kapuas kelia endang idup bumai betaun. Sida seruran berimba belama-lama ngerembaika tanah temuda sida ari Nanga Samu lalu besatup enggau rimba menua Baketan nyentuk ke  Lubuk Baang.

Kenu ku jerita tuai Dayak Iban, Kalanang anak Demong seduai Rinda tu bebini jadi enggau indu ti benama Laus lalu beranakka Tuah; Tuah bebini jadi enggau Sarong lalu beranakka Seing; Seing bebini jadi enggau Laai lalu beranakka Busu; Busu bebini jadi enggau Jering. 

Busu seduai Jering beranakka Uyut “Bedilang Besi”, Beremas indai Tur “Bayang”, Menging indai Sullang enggau Rinda II  Indai Beliang. Semua peturun sida tu belaki bebini nampung adat Demong ke jadi enggau Rinda I magang.

Datai ba serak Busu ti nyadi tuai Dayak Iban di Paku, sida diau mendam bumai betaun di  Nanga Talar. Udah betaun-taun diau dia, Busu matak bala nembiak iya pindah ke  Nanga Sungai Lelabi; udah nya ke  Nanga Meluang lalu pindah baru ke  Kerangan Deras. Ari nya Busu  matak bala pindah baru ke Nanga Beduru ti endur iya parai tuai.

Mati Busu, menantu iya ti benama Belaki nganti  iya nyadi tuai enda lama laban iya pandak umur dibunuh bansa Seru. Udah parai Belaki lama ga orang Paku Ulu nadai agi tuai. Kebuah pia laban maya nya anak tuai Busu ke benama Uyut “Bedilang Besi” udah bebini jadi enggau Nangku anak Saang seduai Selaka ti endur iya nguai ke bini iya di menua Paku Ili.

Uyut Bedilang Besi

Apin tentu lama udah penusah ti nuntung Belaki seduai Beremas, Awan ari Padeh bisi datai ba rumah Bayang seduai Ugap di Nanga Meluang nanya Lada ke bini iya. Tuju penatai  Awan nya pan diperundingka sida Uyut “Bedilang Besi” enggau aya sida Jimbai. Sida nerima  Awan ke laki Lada laban sida nemu iya endang tuai kayau ti tebilang  di menua  Padeh.

Maya nya, Ugap seduai Tur “Bayang Kain” apin chukup umur  nyadi tuai nganti apai seduai. Nya mih kebuah sida semenua nya milih Awan lalu nyadi tuai megai bansa Iban Paku Ulu. Paku Ili dipegai  Uyut “Bedilang Besi” nganti mentua iya Saang.

Uyut “Bedilang Besi” bebini ngambi Nangku anak Saang seduai Selaka lalu beranakka Pala, Linggir, Nisi, Sendai, Empari, Cheremi enggau Entemang. Pala belaki ngambi Renggie Uchu Jantin “Moahari” ari Padeh lalu beranakka Kalanang II, Saang, Busu II, Janta, Jantin enggau Radin.

Linggir Mali Lebu 

Kalanang II bebini ngambi Payung lalu  beranakka Uyut II; Uyut II bebini jadi enggau Sawat lalu beranakka Linggir “Mali Lebu”.  

Tuai Bujang Berani ti benama Linggir Anak Uyut II ti bensumbar Mali Lebu, bebini jadi enggau Anong lalu beranakka Umang, Penghulu Kinyeh, Saang II. Umang belaki jadi enggau Penghulu Garran ti bensumbar Lembang Batu lalu beranakka Uyut III, Saga, Tupang, Cherembang, Libau, Kerbau enggau Attat. Peturun anak telesak Tindin “Pimpin Bragah Ngindang” tu agi nguan menua Batang Paku nyentuk ke maya hari diatu. Kelimpah ari nya, mayuh sida tu berumpang  menua  Sungai Kalaka di sebelah menua Batang Krian enggau Sebelak nyentuk ke menua Batang Rajang (Sarikei, Pakan, Julau, Kanowit enggau iya ti bukai).  

 (Betampung ba Tusun Ke-27  minggu nyin ila)

Nya mih pun penatai nama bansa Dayak ti bejaku ngena jaku Iban di Sarawak sepengudah sida belaya enggau bansa Baketan di menua Paku. Udah peturun anak telesak Numpi di besaruk enggau bansa Baketan di menua Paku. Bansa Iban majak berumpang menua ukai deka ngiga munsuh tauka nyadi “headhunters” munyi ku penulis bansa bukai. Sida  deka ngiga menua baru ti tau diperumpang sida endur bumai betaun. Terima kasih ngagai kaban FB ti udah ngirumka mayuh gambar bansa Dayak Borneo. 

Ditulis Harry Usup Umbar (B.Sc Hons.Human Development, UPM)